Politika korporatiboa

Ihobek ingurumenaren hobekuntza hartzen du helburutzat, ingurumen-irizpideak politika sektorialetan txertatuz, gure herrialdearentzat eta beraren erakundeentzat balio lehiakor jasangarria duen elementu gisa.

Erakunde publiko, eredugarri eta berritzaile bat gara, Euskadiko ingurumen-hobekuntza bultzatzen duena administrazio publikoekin, enpresekin eta herritarrekin lankidetzan arituz. Euskadiko ingurumenaren alorreko erreferentea izan nahi dugu, eta ingurumenaren hobekuntzan eta jasangarritasunean aurreratua den eskualde gisa nazioartean kokatzen lagundu nahi diogu.

2030rako GJHak –Euskadi Basque Country 2030 Agendan jasoak- hartzen ditugu erreferentziatzat gure jarduna ekintza-plan unibertsal, integral eta eraldatzaile baten bidetik eramateko, giza garapen jasangarria bultzatzea xedetzat hartuta.

Horretarako, alderdi interesatuek gugandik espero dutena eta eskatzen digutena integratu eta atenditzen dugu, eta politika korporatibo hau gureganatzen dugu. Beraren bidez, gure jarduera gauzatzen dugu lau zutabe hauetan oinarrituta:

Kudeaketa publiko aurreratua

Gobernu Korporatiboko jardunbide aurreratuei helduz, garatzen ditugun jardueren efizientzia eta etengabeko hobekuntza lortuz, jardunbide jasangarriez baliatuz, gure baliabideak modu arduratsu eta eraginkorrean administratuz.

Erakundearen helburuen lorpenean eragina izan lezaketen arriskuak kudeatuz, arrisku horiek minimizatu eta aukerak aprobetxatu ahal izateko.

Gure pertsonen eta gure erakunde hornitzaileen zein bezeroen babeserako egokiak diren lan-baldintza seguru, jasangarri eta osasungarriak bultzatuz, laneko arriskuen prebentzioa gure jardunaren maila guztietan integratzen dela segurtatuz.

Gure jardunean aplikatzekoak diren edo gure borondatez onartzen ditugun erreferentziazko arauetan eta legezko zein arauzko esparruetan ezarritako betekizunak betez.

Pertsona motibatuak eta arduratsuak, berdintasunarekin eta euskararekin konprometituak

Gure pertsonak inplikatuz, motibatuz eta haien gogobetetasuna lortuz, lidergoaren bidez eta pertsonen garapen profesionalaren bitartez.
Euskararen presentzia, erabilera eta kudeaketaren normalkuntzarekin konprometituta, gure erakundearen eta gure pertsonen aldetik.

Emakumeen eta gizonen tratu-berdintasuna bermatzera zuzendutako neurriak ezarriz, hala lan-baldintzetan nola enpleguaren kalitatean, eta baita erakundearen kanpora begirako jardueretan ere, eta, horri lotuta, sexu-jazarpena eta sexuak eragindako jazarpena prebenitzeko eta eragozteko ekintza espezifikoak ere gauzatuz.

Gure bezeroen beharretara orientatuta, gure hornitzaileekin lankidetzan arituz

Harreman jasangarri bat eraikiz gure erakunde hornitzaileekin, eta tratu-berdintasuna eta konkurrentzia-printzipioa bermatuz, prozesu garden, objektibo eta inpartzialen bitartez.

Haien beharrak atenditzeko eta betetzeko xedez egindako jarduerei buruzko informazio esanguratsua eta egiatia emanez alderdi interesatuei, modu gardenean. Gure bezero diren erakundeei balioa etengabe erantsiz, konfiantzaren eta etengabeko elkarrizketaren bidez.

Aliantza-sare bat bultzatuz eta berrikuntza gure identitatearen osagai gisa sustatuz

Konfiantzan eta elkarren arrakastan oinarritutako aliantza-sare bat ehunduz. Sormena, inspirazioa eta berrikuntzaren kudeaketa sustatuz, etorkizuna eta gure lehiakortasunaren hobekuntza bermatzeko bide gisa.

Informazio erabilgarria jasotzeko, aztertzeko, balioesteko eta hedatzeko lana sistematizatuz, Zaintza eta Adimen prozesuaren bitartez, gure bezeroei balio erantsia emateko.

Ingurumena babestearen eta kutsadura prebenitzearen alde lan eginez, ikuspegi jasangarri batetik, eredugarritasunaren eta Ihobeko pertsona guztiak ingurumen- eta gizarte-hobekuntzan inplikatzearen bidez, gure jardunetik harago.

Ihoberen eginkizunak

• Ingurumen-arloan eskuduna den sailaren ildoen pean, egungo eta etorkizuneko ingurumen-politika garatzen eta jasangarritasun-kultura zabaltzen laguntzea Euskal Autonomia Erkidegoan; batez ere, klima-aldaketaren, biodibertsitatearen, lurzoruaren zein airearen kalitatearen, hondakinen, ekoizpen eta kontsumo jasangarriaren eta hiri-ingurumenaren eremuan.
• Ingurumen-politikak diseinatzen eta ezartzen laguntzea ingurumen-arloan eskuduna den sailari, bai eta ingurumen-kudeaketaren, -kontrolaren eta -berreskurapenaren arloko jardueretan laguntzea ere.
• Ingurumen-ezagutza sortzea eta hedatzea eta ekoberrikuntza sustatzea Euskal Autonomia Erkidegoan.
• Administrazio Publikoekin, enpresekin eta herritarrekin elkarlanean aritzea, Euskal Autonomia Erkidegoko ingurumen-xedeak bultzatzen dituzten jarduerak egiteko.
• Ingurumen-arloan eskuduna den sailarekin erakunde laguntzaile gisa jardutea, sail horrek ematen dituen diru-laguntzak kudeatzeari begira; beti ere, indarrean den araudiaren mende.
• Euskal Autonomia Erkidegoko ingurumena babestearekin eta hobetzearekin zerikusia duen bestelako edozein jarduera.

• Ingurumenarekin zerikusia duten enpresen kapitalean partaidetza edukitzea, Eusko Jaurlaritzaren aurretiko baimenarekin eta kasu bakoitzean zehazten diren baldintzekin.
• Jarduera propioak nahiz hirugarrenenak babesteko akordioak egitea enpresekin edo erakunde publikoekin, garapen jasangarriari, ingurumen-komunikazioari eta -sentsibilizazioari, ingurumen-heziketari eta oro har ingurumena hobetzearekin lotutako jarduerei laguntzera zuzenduta badaude horiek.
• Diru-laguntzak ematea, indarrean den araudiaren mende erabat.
• Euskal Autonomia Erkidegoko Ogasun Orokorraren, Euskal Autonomia Erkidegoko beste erakunde eta entitate publiko batzuen eta sektore publiko estatalaren edo erkidearen diru-laguntzak eta bermeak jasotzea.
• Finantza-erakunde publiko eta pribatuen maileguak jasotzea.

Antolaketa-egitura

ADMINISTRAZIO KONTSEILUA

Administrazio Kontseilua da Sozietatearen kudeaketa- eta ordezkaritza-organoa, eta gutxienez hiru partaide eta gehienez zazpi izango ditu. Partaide horiek akziodunen Batzar Nagusiak izendatuko ditu, indarrean dauden lege- eta estatutu-arauen arabera.

Administrazio Kontseiluaren eskumenak Sozietatearen Estatutuan zehaztutakoak dira. Horien artean, honako hauek azpimarratu daitezke:

• Sozietatea ordezkatzea era guztietako egintza eta kontratuetan.
• Urteko Kudeaketa Plana onartzea, aurrekontuen proposamena barne sartuta, eta planaren gauzapenari buruzko ebaluazio partzialak egitea.
• Sozietatearen gizarte-erantzukizunari buruzko politika onartzea eta horren aplikazio maila kontrolatzea eta gainbegiratzea.

Parte-hartzaileak:

Ihobe Sozietate Publikoaren sozietate-estatutuen arabera, beraren Administrazio Kontseilua osatzen duten partaideak gutxienez 3 pertsona eta gehienez 7 dira.

Ihoberen Historia

Ihoberen historia enpresekin partekatutako lan-ibilbidearen emaitza da. Ingurumenaren hobekuntzan eta bizi-kalitate hobean laguntzeko. 1983an sortu zenetik, Ihoberen jarduera Ingurumenaren hobekuntzan oinarritu da, EAEko politika publikoetan ingurumen-aldagaia txertatuz. Ingurumen-jasangarritasuna lehiakortasunerako elementu bihurtzea enpresentzat eta lurraldearen garapen iraunkorra bultzatuz.