URA, Uraren Euskal Agentzia, urari buruzko politika Euskadin gauzatzeaz arduratzen den erakunde bateratua da. Eusko Jaurlaritzaren erakunde bat da, administrazioen eta pertsona erabiltzaileen parte-hartzea duena.

Agentzia ekainaren 23ko Uraren 1/2006 Legearen bitartez eratu zen, eta juridikoki zuzenbide pribatuaren mende dagoen erakunde publiko bat da, nortasun juridiko propioa duena. Halaber, Eusko Jaurlaritzako Ingurumen, Lurralde Plangintza eta Etxebizitza Sailari atxikita dago.

URA sortzeko helburua izan zen Europar Batasuneko Uraren Esparru Zuzentarauan eta Uraren Euskal Legean ezarritako betekizunak betetzea; horien xedea da ur-ingurunea babesteko politika integral bat ahalbidetzea.

Horretarako, Agentziak foru administrazioen eta EAEko administrazioaren eskumenak koordinatu eta batzen ditu, eta horren bidez saihesten du Uraren Legea onartu aurretik eskumen aldetik zegoen sakabanaketa, baimenei, kontzesioei eta diziplina hidraulikoari dagokienez.

Beraren jardunbideak honako hauek dira:

1. EAEko ur-masen egoera ekologikoa hobetzea.
2. Kantitate eta kalitate oneko hornidura unibertsala lortzea.
3. Saneamendu-planak amaitzea.
4. Ura eraginkortasunez administratzea.
5. Urari buruzko ikerketak egitea eta baliabide gisa jasangarritasunez aprobetxatzea.
6. Berrikuntza teknologikoa uraren alorrean sustatzea eta bultzatzea.
7. Uraren kudeaketan inplikatuta dauden giza baliabideen maila hobetzera zuzendutako informazioa eta prestakuntza eskaintzea.

Laburbilduz, herritarrei zuzendutako zerbitzu publiko bat da, zeregintzat hartzen duena ur-ingurunea egoera onean mantentzea, ahalik eta bermerik onenarekin, Euskadin bizi diren pertsonen ur-beharrak asetzeaz batera.