Jardunaldi telematiko baten barruan, Ihobek kontratazio-pleguetan ingurumen-irizpideak sartzerakoan ohikoenak diren zenbait oker azaldu zituen, lizitazioan zailtasunak saihesteko eta eskaintzak aurkeztea eta ebaluatzea errazteko nola zuzendu daitezkeen azalduz. Hirurogeita hamar pertsonak baino gehiagok hartu zuten parte jardunaldian, eta oso pozik agertu ziren jasotako informazio baliotsuarekin.

Sektore Publikoko Kontratuei buruzko 9/2017 Legeak jasotzen du non eta nola sartu ingurumen-irizpideak erosketa eta kontratazio publikoetan, baina okerrak gertatzen dira kontratazio-pleguetan ingurumen-klausulen definizioan, eta horrek prozesuan zehar arazoak sortzen dizkie bai enpresa lizitatzaileei bai kontratu-organoei lizitazioaren.

Ihobetik oker ohikoenak errepasatu ziren: ingurumen-irizpideak definizio espezifikorik gabe sartzea, “edo baliokidea” ez jartzea legeak hala eskatzen duenean, produktu bat ekoetiketa jakin batekin ziurtatuta egotea eskatzea, ondoren PCAPn jasotzen ez diren balorazio-irizpideak iradokitzea, nola baloratuko diren argi eta garbi definitu gabe balioetsi daitezkeen ingurumen-irizpideak sartzea, formula bidez balora daitezkeen irizpideak balio-judizioaren bidez balora daitezkeenekin nahastea, lizitatzaileak ingurumen-kudeaketako sistema bat izan dezala baloratzea, ingurumen-kudeaketako sistema ziurtatua izatea eskatzea kaudimen-irizpide gisa, edo zehaztapen teknikoak egikaritze-baldintza gisa sartzea.

Jardunaldian Euskadiko kontratazio arloko teknikarien iritziak eta ekarpenak jaso ziren, baina jardunaldiarekin online bat egin zuten Tenerifeko, Bartzelonako eta Viladecanseko pertsonek ere hartu zuten parte.