Udalsarea 2030 ICLEIko (Jasangarritasunaren aldeko Tokiko Gobernuen Sarea) kide da. Hori horrela, sare horrek Udalsarea 2030ek bere 20 urteko ibilbidean izan dituen une gogoangarri eta lorpenen berri eman du bere webgunean.

Udalsarea 2030 ICLEIko kide da 2003tik.

Gainera, lankidetza hori indartu egin zen Europako Hiri eta Herri Jasangarrien 8. Konferentzia Euskadin egin zenean. Bertan, Euskal Adierazpena landu eta sinatu zen, eta horrekin bat egin dute Europa osoko tokiko 955 erakundek baino gehiagok.

Eusko Jaurlaritzaren Ekonomiaren Garapen, Jasangarritasun eta Ingurumeneko sailburu eta Udalsarea 2030en presidente Arantxa Tapiak ICLEIren webgunearentzat adierazi duenez, Euskadin tokiko garapen jasangarrirako politiketan aurrera egiteko eta politika horiek finkatzeko giltzarri nagusiak Udalsarea 2030 sareak jasangarritasunarekin konprometituta dauden udalerriei eskaintzen dien kohesioa eta lankidetza izan dira.

Gaur-gaurkoz, taldean lan egiteko formulak sarearen bereizgarri dira, eta ekintza-planen bidez tokiko jasangarritasunarekin konprometituta dauden udalerriak asko dira (ia euskal herritar guztiak biltzen dituzte), ICLEIk emandako informazioan zehazten den moduan.