Euskadi 2050erako zero emisioko helburua ezarri duten klimaren anbizioan liderrak diren hemezortzi estatu eta eskualdeetako bat da. Hala jasotzen da The Climate Group-ek estatu eta eskualdeen ekintza klimatikoko planei buruz maila orokorrean egindako txostenean.

The Climate Group klima-aldaketaren gainean lan egiten duen mugimendu bat da, arlo publikoaren eta pribatuaren arteko lankidetzatik abiatuta, eta Euskadi haren parte da 2010etik. Irabazi-asmorik gabeko erakunde hau 2004an sortu zen CO2 isuriak murrizten laguntzen duten politikak eta teknologiak sustatzeko xedearekin. Erakundeak munduko 80 konpainia handienetakoak eta eskualdeko eta tokiko gobernuak biltzen ditu.

Parisko Akordioaren (COP21) bosgarren urteurrenarekin bat etorriz, The Climate Group-ek 2020an klimari eta ingurumenari buruzko datuak zabaldu dituzten 121 estatu eta eskualdeen datuak aztertzen ditu. Zero isuri izateko helburu garbiak ezarri dituzten 18 estatu eta eskualdeez gain, 21 estatuk eta eskualdek epe luzeko helburuak ezarri dituzte isuriak % 75 eta % 90 artean murrizteko. Txostenaren arabera, 2030erako isuriak murrizteko helburua duten eskualdeen % 55ek kide diren estatuek baino asmo handiagoa dute.

2030erako helburu baten berri ematen duten estatu eta eskualdeen % 90ek bat egiten dute IPCC-k berotegi-efektuko gasen munduko isuriak 2010eko mailekin alderatuta % 40-50 murrizteko helburuarekin.

The Climate Group-eko kide diren estatu eta eskualdeen heren batek dio teknologia garbiko enpresen kopuruak gora egin duela

Estatuen eta eskualdeen ekintza klimatikoko planak maila orokorrean aztertzen dituen txostenak jasotzen duenez, estatu eta eskualde informatzaileek sortutako elektrizitatearen % 47 iturri berriztagarrien bidez sortutakoa da, eta elektrizitatea sortzeko ikatzaren erabilera % 12ra igo da, batez beste, mundu mailako % 38ko batez bestekoarekin alderatuz. 

Lorpenekin batera, The Climate Group osatzen duten gobernuek kezka agertu dute klima-aldaketaren eta beste ingurumen-mehatxu batzuen inpaktuek okerrera egin dutelako. Klima-aldaketari lotuta, nahastuta 781 inpaktu jasaten ari dira guztira, osasun publikoan, azpiegituran eta finantzetan ondorioak dituztenak, eta uraren segurtasunean beste 243 inpaktu izan direla jakinarazi dute. Txostenean parte hartutako 121 estatu eta eskualdeetatik, 39k berariaz eman dute klima-aldaketari lotutako osasun publikoko arriskuen berri, beren mugen barruan, eta, oro har, eskualdeen % 60 neurriak hartzen ari dira egokitzeko.

Txostenean, gobernuei eskatzen zaie deforestazioari eta baso-degradazioari era aktiboan aurre egin diezaiela. Estatuen eta eskualdeen % 91k uste badute ere deforestazioaren eta baso-degradazioaren tokiko inpaktuak larriak edo oso larriak direla, % 46ak baino ez ditu politikak zehaztu eta % 18ak bakarrik helburuak ezarri dituzte eskualde osoan arazoari aurre egiteko.