EUDEL Euskadiko Udalen Elkarteak Udalsarea 2030en 63. Batzorde Teknikoa hartuko du ekainaren 14an, asteazkenean, Bilbon (Ertzilla, 13). Topaketan, sareko idazkaritza teknikoak garapen jasangarriko politika publikoen hamaikagarren ebaluazio- eta jarraipen-programaren itxierari buruzko informazioa emango du, baita klima-aldaketan udalei laguntzeko estrategiari buruzkoa ere.

Klimaren eta energiaren aldeko Euskadiko toki mailako lehen estrategiaren helburua hainbat udalerri-profiletarako laguntza egokitzea eta klimari eta energiari buruzko araudia betetzen laguntzea da. Halaber, emisioak arintzeaz gain, lurraldea klima-aldaketaren inpaktuetara egokitzeko bidean aurrera egitea ahalbidetuko du, bai eta herritarrak tokiko ekintzan murgiltzea ere. Horretarako, funtsezkoa da gizartera iristen diren mezuen koherentzia ziurtatzea, klima-larrialdiarekin zerikusia dutenena batez ere.

Guztira 14 udalerri eta eskualde (Abanto Zierbena, Amurrio, Balmaseda, Basauri, Bilbo, Donostia, Durango, Eibar, Errenteria, Irun, Legazpi, Gasteiz eta Gorbeialdeko Kuadrillako, Nerbioi-Ibaizabal Mankomunitateko eta Oarsoaldeko eskualde-erakundeak) elkartu dira Euskadin trantsizio klimatiko eta energetikoaren aldeko tokiko ekintza sustatzeko estrategia bateratuaren prestaketan. Estrategia hori Energiaren Euskal Erakundeak (EEE) eta Ingurumen Jarduketarako Ihobe Sozietate Publikoak sustatu dute, Udalerri Jasangarrien Euskal Sarearen (2030) eta LIFE IP Urban Klima 2050 proiektuaren laguntzarekin.

Idazkaritza teknikoak Lanbideren “Klimaren aldaketari eta trantsizio energetikoari buruzko gazte-enplegua toki-administrazioan” programaren bigarren deialdiaren xehetasunak emango ditu. Programa Erreminta-gidaren barruan dago eta EEEk eta Ihobek sustatzen dute, Novia Salcedo Fundazioarekin lankidetzan.

Batzorde Teknikoaren bigarren partean, etenaldiaren ondoren, Ekonomia zirkularrerako hondakinei eta lurzoru kutsatuei buruzko 77/2022 Legeak toki-erakundeentzat dituen ondorioei buruzko mintegia egingo da.

Ekonomia zirkularrerako hondakinei eta lurzoru kutsatuei buruzko Legearen helburua hondakinen sorrera eta horien sorkuntzak eta kudeaketak eragindako ondorio kaltegarriak prebenitzea eta murriztea, baliabideen erabileraren inpaktu globala txikitzea eta erabilera horren eraginkortasuna hobetzea da, azken batean, ingurumena eta giza osasuna babesteko eta ekonomia zirkularrerako baterako trantsizioa egiteko, barne-merkatuaren funtzionamendu eraginkorra eta epe luzerako lehiakortasuna bermatzeko.

Araudiak zenbait betebehar eta mugarri ezartzen dizkie toki-erakundeei. Saioak izaera praktikoa izango du, udalerriek eta eskualdeko erakundeek araudia betetzeko izango dituzten beharrak ezagutzeko aukera izan dezaten.