Auria enpresak jasotako dirulaguntza EAEko industrian ekodiseinuko eta ekonomia zirkularreko proiektu berritzaileak egiteko laguntza-programaren esparruan eman da, Europako Eskualde Garapenerako Funtsak finantzatuta.

Auria Solutions Vitoria enpresa automobilgintzako osagaien TIER 1 motako enpresa bat da. Ekoizten dituen produktu nagusiak ibilgailuetarako zoruak (aurrekoak eta atzekoak) eta alboetako panelak dira. Produktu horiek plastiko desberdinen geruzez ekoizten dira, eta horiek banantzen zailak dira, alegia, nekez birzikla daitezke. Hala, ekoizpen-prozesuan ebakin handiak botatzen dira zabortegietara, birziklatze-prozesu egokirik ez dagoelako. Ohiko ekoizpen-egoeran, 3.000 tona ebakin botatzen dira urtean.

AURIAk pasa den otsailean hasitako proiektua ProTIER deitzen da, eta 2020. urtean baliabide materialak optimizatzeko eta material berrerabilgarriak zabortegira botatzea ekiditeko konponbide berritzaileak bilatzea izango du xede. Horretarako, GAIKER zentro teknologikoarekin lankidetzan arituko da, Basque Research and Technology Alliance-ko kidea berau (BRTA), baita ZICLA ingurumeneko aholkularitza-enpresarekin ere.

ProTIER proiektuak helburu bat baino gehiago ditu. Lehena, urtean 1.000 tona material berreskuratzea, AURIAk ekoizten dituen zoru eta panel berrietan berrerabiltzeko. Horretarako, materialen gaikako bereizketa optimizatuko da, lantegian bertan erabiltzeko. Abiapuntua ehotze- eta bereizketa-prozesua izango da (AURIA egun garatzen ari dena), enpresa hornitzaileetatik eskuratutako materiala erabilita.

Gainera, ebakinak balio handiko beste sektore batzuetan –esaterako, altzarigintzan– aplikatzeko moduak ikertuko dira, birziklatze mekanikoaren aldean berrerabilera indartzeko.