2023ko irailaren 28an eta 29an hasi da CircularFest 2023 Iquique hirian (Tarapacá eskualdean), eta Txile osoa ibiliko du bi hilabetez, ekonomia zirkularraren ezagutza praktikoa sustatzeko. Hala, ospe handiko hizlari nazionalak eta nazioartekoak bildu dira, eta mahai-inguruak eta eskualdeko komunitateentzako doako lantegiak izango dira. Festibalaren hasierak, orobat, CircularTec Ekonomia Zirkularreko Zentro Teknologikoaren inaugurazio ofiziala ekarri du, Txileko iparraldean zirkulartasunerako garapen eta berrikuntza teknologikoa bultzatuko duena.

Ihobek ireki du festibala, eta, bertan, ekonomia zirkularra defendatu du lurraldeen garapen jasangarrirako giltzarri gisa, eta haren hedapenean Euskadik egindako ibilbide luzearen berri eman du.

“Euskadiko negozio-ereduen trantsizio ekologikoak lurralde osoko enpresen ingurumen-portaera hobetzea ekarri du, eta, aldi berean, nazioarteko merkatuan garatzen ditugun produktu eta jardueren lehiakortasuna bereizteko eta hobetzeko faktore berri bat ere, gero eta gehiago eskatzen eta baloratzen dituena ingurumen-kontzeptu fisikoak” nabarmendu du Ihobeko Ekonomia Zirkularraren arloko zuzendari José María Fernándezek—. “Horrek guztiak herritarrentzat aberastasun eta ongizate handiagoa sortzen lagundu du, garapen iraunkorraren printzipioak gure gizartean txertatuta” —esan du, halaber—.

Euskadi, ekonomia zirkularraren eta ekodiseinuaren abangoardian

Mundua gero eta erabakitasun handiagoaz eredu zirkularretarantz mugitzen den bitartean, Euskadik urteak daramatza gai horiekin ohituta, Ihoberen lanari esker. 2003an dagoeneko, Ihobe izan zen ekodiseinuko lehen araua (UNE 150301, gaur egun UNE-EN ISO 14006) garatzeko eta euskal enpresetan ezartzeko abiarazlea. Ondoren, 2011n, Basque Ecodesign Center ekimena gidatu zuen, ekonomia zirkularrean eta ekodiseinuan proiektu ekoberritzaileak diseinatzeko, ezagutza sortzeko eta euskal enpresa handien balio-katea bultzatzeko aliantza publiko-pribatu handiena.

2021 ezkero, gainera, Ihobek Basque Circular Hub Euskadiko ekonomia zirkularreko zerbitzu aurreratuen zentroak kudeatzen ditu. Horiek aurreko bi ekimenetan metatutako esperientzia guztia jasotzen dute: Ekodiseinu Gela programa (2003-2014) eta Basque Ecodesign Hub (2015-2020). Estatuan eta Europa hegoaldean erreferente, Basque Circular Hub ekimen paregabea da ekonomia zirkularraren esparruan merkatu-prospektiba, prestakuntza aurreratua, joeren analisia eta ezagutza aditua sortzeko zerbitzuak eskaintzeko. Ihobek ere etengabe bultzatu du ekoberrikuntza euskal enpresa-sektorearen barruan, eta apustu horrek Euskadi esparru horretan Europako eskualde aurreratuenetako bat dela aitortzea izan du sari.

CircularFest 2023 Txile osora hedatuko da urrian eta azaroan, aditu nazionalak eta nazioartekoak bilduko dituen jarduera-egutegi batekin. Aditu horiek, hitzaldi inspiratzaileen, elkarrizketa-mahaien eta hezkuntza-lantegien bidez, zirkulartasunak egungo ekonomian duen garrantzia eta inplikazioak jorratuko dituzte.