Ihobe Eusko Jaurlaritzaren Ingurumen Jarduketarako Sozietate Publikoak eta Energiaren Euskal Erakundeak, ‘Erreminta-Gidaren’ zerbitzuak zehazteko tokiko bisita erronda bat jarri dute abian. Dokumentu horrek tokiko eta eskualdeko administrazioaren esku jarritako tresnak biltzen ditu, energia- eta klima-trantsizio energetikoari aurre egiteko. Arratia-Durangaldea eskualdeetara zuzendutako lehenengo bisita, Amorebietako Zelaieta zentroan egin zen azaroaren 3an, ostegunean.

Topaketek, gainera, klima-aldaketari eta energia-trantsizioari buruzko prestakuntza-programa aurkezteko balio dute. Programak helburu bikoitza du: gazteak gaitzea, eta euskal udalerriek energia-trantsizioari eta klima-aldaketari lotutako erronkei aurre egin ahal izatea.

Eskualdeko bisita errondak, EEEko eta Ihobeko zuzendari nagusiak bertan direla, Debagoiena-Debabarrena eta Aiara-Zuia eskualdeetan jarraituko du, azaroaren 10ean eta 16an, hurrenez hurren. Energiaren

Euskal Erakundeak eta Ihobek eskualdeko 12 topaketa aurreikusi dituzte guztira, eta horien deialdiak astero eguneratuko dira webgune honetan, Euskadiko tokiko eta udalaz gaindiko erakundeei ‘Erreminta-Gida’ gizarteratzeko, Udalsarea 2030 sareari atxikitako erakundeen saretik abiatuta.

Udalerri jasangarrien Udalsarea 2030 euskal sarearen bidez zabaldutako ekimena urriaren 24an hasi zen, astelehenean, teknikari eta hautetsiei zuzendutako online mintegi batekin. Bertan, klima-trantsizioaren eta -aldaketaren esparruan pauso berriak emateko ‘Erreminta-Gida’ proiektuan jasota dauden euskarriak eta laguntza-programak jarri ziren tokiko administrazioaren eskura.

Toki-administrazioek, enpresekin, erakundeekin eta herritarrekin batera, zeregin garrantzitsua dute berotegi-efektuko gasak murrizteko eta klima-aldaketara egokitzeko helburuetan aurrera egiteko, mugikortasunarekin, ingurumenaren babesarekin, 0 kilometroko produktuen kontsumoarekin eta energia berriztagarria sortzearekin lotutako jardueren bidez.

Tokiko gazte-enplegua klima-aldaketan eta energia-trantsizioan

Ekimenaren helburua tokiko administrazioei klima- eta energia-planak garatzen laguntzea da, euren beharrizan zehatzetara egokituta, euren jarduera-eremuetan ingurumen-jasangarritasuna hobetzeko, gazte horien kontratazio finantzatuaren bidez. Bestalde, Lanbidek, Novia Salcedo Fundazioak, Ihobek eta EEEk kudeatutako prestakuntza-programa horri esker, toki-administrazioan sartu berri diren talentu gazteek energia-trantsizioari eta klima-aldaketari buruzko prestakuntza jasoko dute.

Erreminta-Gida

Erreminta-Gidak, administrazioei laguntzeko zerbitzuen kartak, lehentasunezko bi helburu ditu. Alde batetik, Euskadiko toki-administrazioei gaitasunetan, euskarri teknikoan, laguntzetan eta aintzatespenean oinarrituta egongo den eta arlo horretan erabilgarri dauden baliabideen erabilera maximizatzen lagunduko duten tresnak eta zerbitzuak emango dituen energia- eta klima-trantsizioarekin lotutako jardueretan laguntzeko proiektu bat diseinatzea eta abian jartzea. Eta, bestetik, energia- eta klima-arloko politikak hartzea errazteko eta toki-erakundeek arlo horretan duten konpromisoa eta lidergoa ikusarazteko ibilbide-orri bat ezartzea Euskadiko udalerri eta eskualdeetarako.

Hona hemen orain arte berretsi diren bileren aurreikusitako datak:

Data	Eskualdea	Lekua
Azaroak 3 - 9:30ean	Arratia-Durangaldea	Amorebieta (Zelaieta zentroa)
Azaroak 10 - 9:30ean	Aiaraldea	Amurrio (Kultur Etxea)
Azaroak 16 - 9:30ean	Debagoiena- Debabarrena	Eibar (Debegesa)