“Erronka Garbia” Erronka Garbia Ihobek garatutako prozedura bat da, eta ekitaldiak egiteak ingurumenean eragiten dituen inpaktu negatiboak minimizatzea ahalbidetzen du. Metodologia hori aplikatzearen eta gero Erronka Garbia-Ekitaldi Jasangarria ziurtagiriaren bidez aitortzearen helburua da ekitaldira bertaratzen diren pertsonak eta erakunde antolatzaileak ekitaldi jendetsuen garapenarekin lotutako eragin negatiboak arintzeko beharraz kontzientziatzea.

Ihoberen Ingurumen Jasangarritasuneko zuzendari Xabier Gonzalezek Ihobek diseinatutako metodologia erakutsi die Estatu osoko turismo-operadoreei. Metodologia horrek “hiru oinarri nagusi ditu: jardutea, neurtzea eta ekitaldiaren izaera jasangarria jakinaraztea, mota horretako jarduera jendetsuak garatzen diren ingurunean inpaktu kaltegarriak minimizatzea ahalbidetzen duen prozedura baten bidez”.

Turismo-sektoreko operadore nagusiek lehen eskutik ezagutu dute mota guztietako ospakizun eta ekitaldiekin lotutako ingurumen-inpaktu negatiboak minimizatzeko prozedura

Bere hitzaldian azaldu duenez, “ekitaldi baten diseinuan ingurumen-irizpideak txertatzeak hainbat onura dakarzkio erakundeari berari, hala nola uraren kontsumoan aurreztea, baita lehengaienean ere, berrerabilpenari esker; kostuak murriztea, energia-efizientzia handiagoari esker edo hondakin gutxiago sortzeagatik, eta horrek, aldi berean, kudeaketa-kostuak aurreztea eragiten du”.

Ekitaldi bat Erronka Garbia markapean ziurtatzeko, ziurtagiria eskatzeko inprimakia bete behar da ekitaldia antolatu aurretik. Ekitaldia egin bitartean, Ingurumenaren Jasangarritasunerako Plana osatu behar da. Erakundeak planean zehaztutako jarduketak eta neurriak bete dituela egiaztatuko du Ihobek auditoria presentzial baten bidez. Ekitaldia egin ondoren, erakundeak ekitaldiaren ingurumen-inpaktua kalkulatu behar du Erronka Garbia kalkulagailuaren bidez, eta ekitaldiaren ingurumen-adierazpena entregatu behar du.

Metodologia hori abian jarri zenetik, ziurtatutako ekitaldien kopuruak etengabe egin du gora; 2016an 8 izan ziren, eta, 2022an, berriz, 66. Orain arte, 2023ko urtarrila-urria aldian 85 ekitaldi ziurtatu dira; horietatik % 60 Bizkaian egin dira, % 26 Gipuzkoan eta % 14 Araban.

Tipologiaren arabera, ziurtatutako ekitaldi gehienak kongresuak edo konferentziak dira (% 44), baina erakusketak (% 11), kirol-ekitaldiak (% 8), lanbide-azokak (% 7), kontzertuak eta musika-jaialdiak (% 6), herri-azokak (% 6) eta bestelako ekitaldiak (% 18) ere ziurtatzen dira.