‘Zirkularrak-Circulares’ erakusketak ekainaren 22an irekiko ditu ateak, eta doan bisitatu ahal izango da Donostiako Ingurumen Baliabideen Etxean, irailaren 10era arte

Joan den urtean Gasteiz bisitatu ondoren, hiriaren Europako hiriburutza berdearen hamargarren urteurrenaren esparruan, eta FICOBA azoka-esparrua, Irunen, ekonomia zirkularrari buruzko nazioarteko Basque Circular Summit kongresuaren parte gisa, erakusketa 2023an izango da lehen aldiz Gipuzkoako hiriburuan, ekonomia zirkularreko 140 produktu inguruko bildumarekin. Produktu horiek, besteak beste, kimikaren, elektriko-elektronikoaren, automobilgintzaren, elikaduraren edo metalaren sektoreetan lan egiten duten EAEko hainbat enpresak ekoizten dituzte.

Erakusketaz gain, bestelako jarduera paraleloak ere izango ditu erakusketak: "Txotxongiloak hondakinekin" (uztailak 13 – 11:00etan), "Tu ciudad del futuro" (uztailak 27 – 11:00etan), "Crea tu pavo real" (abuztuak 10 – 11:00etan) eta "Etorkizuneko zure hiria" (abuztuak 24 – 11:00etan). Izen-emateak www.cristinaenea.eus helbidean.

Alexander Boto Ihobeko zuzendari nagusiaren hitzetan, 'Zirkularrak-Circulares' erakusketa ibiltaria “hiru euskal lurraldeetako hainbat udalerritan zehar ibiltzeko asmoz sortu da. Euskadik 20 urte baino gehiagoko ibilbidea egin du, produktuen diseinuaren eta garapenaren fasetik ingurumen-irizpideak aplikatuz, eta Estatuan ekodiseinatutako produktuen eta zerbitzuen produkzioa gidatu du, Europa Hegoaldeko eskualde erreferentetzat hartuz, bereziki industria-eremuan”.

Bestalde, Eneko Calvo Cristina Enea Fundazioko erakusketa-proiektuen arduradunak adierazi duenez, "erakusketa hau gure inguruko enpresek ingurumenaren eskakizun berrietara egokitzeko egiten duten lan eta ahalegin ona ezagutzeko aukera bat da", Cristina Enea Fundazioak sustatu nahi dituen balioekin eta lanarekin bat datorrena.

Ekonomia zirkularreko 140 produktu

Erakusketak produktu askoren lagin zabala biltzen du. Produktu horien fabrikazioan bizi-zikloaren ikuspegia duten ekodiseinuko metodologiak aplikatu dira, eta, beraz, nabarmen murriztu da haien ingurumen-inpaktua. Horrela, 140 produktu baino gehiago biltzen dira Euskadin dauden balio-kateekin lotuta, hala nola makineria, metala, garraioa, altzariak, automozioa, kontsumo-ondasunak, kimika, elikadura, sektore elektriko-elektronikoa edo eraikuntza-materialak.

Horrela, ekodiseinuak enpresa-jardueraren edozein sektoretan duen ahalmenaren ikuspegi integrala izateko aukera ematen du, bai eta euskal enpresek ekonomia zirkularraren esparruan egiten duten lana eta konpromisoa aintzatesteko ere.

Erakusketa ekainaren 22an irekiko da, eta Donostiako Cristina Enea Ingurumen Baliabideen Etxean egongo da zabalik, irailaren 10era arte (sarrera librea eta doakoa).