Aitorpen-ekitaldia Ekoetxea Urdaibai zentroan egin da Ingurumenaren Mundu Egunaren bezperan, eta ingurune naturaletan hondakinak biltzeko herritarrei zuzendutako kanpaina berri bat bultzatzeko balioko du

Aitor Aldasoro Ingurumen Jasangarritasuneko sailburuordea eta Begoña Pedrosa Hezkuntzako sailburuordea, Adolfo Uriarte Natura Ondare eta Klima Aldaketako zuzendariarekin batera, izan dira gaur goizean, mundu osoan ekainaren 5ean ospatzen den Ingurumenaren Mundu Egunaren bezperan, Ekoetxea Urdaibai zentroan (Busturia) ziurtagiriak banatzeko egin den ekitaldian.

Egiaztatutako ikastetxeek IRAES 21 jasangarritasunaren aldeko eskola-sarea osatzen dute, eta bertan elkarrekin bultzatzen dute jasangarritasunerako hezkuntza

Ziurtagiri hau duten ikastetxe publiko eta itunpekoek IRAES 21 jasangarritasunaren aldeko eskolen sarea osatzen dute, eta horietako irakasleek, ikasleek, irakasle ez diren langileek eta familiek elkarrekin bultzatzen dute jasangarritasunerako hezkuntza. Aitor Aldasoro Ingurumen Jasangarritasuneko sailburuordeak bere esku-hartzean nabarmendu du euskal hezkuntza-komunitateak Euskadiko ingurumenaren etorkizunaren eta jasangarritasunaren alde duen konpromisoa. Bestalde, Adolfo Uriarte Natura Ondare eta Klima Aldaketako zuzendariak nabarmendu du ziurtagiri honek duen garrantzia, euren lana, prozedurak, esperientziak eta, azken batean, ikastetxeek hezkuntzari, parte-hartzeari eta jasangarritasunari dagokienez duten kalitatea aitortzen baititu.

Ekitaldian ikasleek eta irakasleek parte hartu dute, eta haiekin batera Eusko Jaurlaritzak aitortutako ikastetxeak dauden herrietako udal-ordezkari eta alkateak ere izan dira. 2030eko Eskola Agendaren “Eskola Jasangarri” ziurtagiria jaso duten ikastetxeak 11 udalerritakoak dira:

• Arabako 2 ikastetxe: Legutio, Gasteiz
• Bizkaiko 9 ikastetxe: Bilbo, Durango, Getxo, Lekeitio, Markina, Muskiz, Zaldibar
• Gipuzkoako 2 ikastetxe: Hondarribia, Zarautz

Ingurumenaren Mundu Eguna

“Eskola Jasangarria” ziurtagiria emateko ekitaldia Ingurumenaren Mundu Eguna dela eta egiten da. Nazio Batuek 1972n ezarri zuten egun hori, eta Euskadiko Ingurumen Zentroen Ekoetxea Sarearen aldetik ingurune naturaletan hondakinak biltzeko herritarrei zuzendutako kanpaina berrirako esparrua izango da. Ihobek, Eusko Jaurlaritzako ingurumena kudeatzeko sozietate publikoak, kudeatzen du, eta, horrez gainera, Let´s Clean Up Euskadi 2024 kanpainako Euskadiko erakunde eta ikastetxeen parte hartzea ere koordinatzen du, parte hartzen duten erakundeak eta herritarrak lurzoru osasungarria eta hondakinik gabea mantentzearen garrantziaz sentsibilizatzeko.

Informazio gehiago eta izen-emateak Ekoetxea Sarearen (www.ekoetxea.eus) eta Ihoberen web-orrietan (https://www.ihobe.eus).

Eskola Jasangarriak 2024

Ikastetxea	Udala
CPEIPS Olabide Ikastola HLBHIP	VITORIA-GASTEIZ
CEIP Garazi HLHI	LEGUTIO
CPEPS Jesuitak Indautxu LBHIP	BILBO
CPEIPS Kirikiño Ikastola HLBHIP	BLBO
CPEIPS Madre De Dios HLBHIP	BILBO
CPEIPS San Jose-Jesuitak HLBHIP	DURANGO
CEIP Zubileta HLHI	GETXO
IES Lekeitio BHI	LEKEITIO
CPEIPS Bera-Kruz Ikastola HLBHIP	MARKINA
CPEIP San Juan Ikastetxea HLHIP	MUSKIZ
CEIP Zaldibar HLHI	ZALDIBAR
CEIP Talaia HLHI	HONDARRIBIA
CPEIPS Salbatore Mitxelena HLBHIP	ZARAUTZ