Hainbat aste igarota sutea itzali ondoren, hondakinak erretzearen ondoriozko airearen kutsaduraren inpaktua desagertu ondoren, eta aztertzen diren kutsatzaileen mailak -konposatu organiko lurrunkorren, partikulen (PM10), hidrokarburo aromatiko poliziklikoen (HAPak), metal astunen eta amiantoaren mailak- hiri-inguruneetarako parametro normaletan egonda, Ingurumen Sailak Plana eguneratzeko erabakia hartu du.

Airearen kalitatearen neurketei buruzko informazioa ematen jarraituko du eta konposatu organiko lurrunkorren, partikulen (PM10), hidrokarburo aromatiko poliziklikoen (HAPak), metal astunen eta amiantoaren mailak neurtzen jarraituko da, inguruneko airearen kalitatearen jarraipena egiteko astean behingo txostenen bidez; orain arte egunean behin ematen ziren. Txostenak Ingurumen Sailaren Twitterreko profilean (@Ingurumena_eus) eta Ihobe sozietate publikoaren webgunean (www.ihobe.eus/vigilancia-ambiental-2) argitaratuko dira.

Konposatu organiko lurrunkorrei dagokienez, neurketa finkoa mantentzen da San Lorenzon martxoaren 30era arte, baita partikulen, HAPen eta metalen neurketak ere. Data horretatik aurrera, PM10 kaptadore bat mantenduko da, eta metalak aztertzen jarraituko da, kutsatzaile horien mailek parametro normaletan jarraitzen dutela ziurtatzeko.

Zabortegiko luiziak eragindako sutea itzaltzeko lanak hasi zirenetik, dioxinen eta furanoen analisien emaitzek beheranzko joera erakutsi zuten, eta, sua itzali ondoren, dioxinen eta furanoen mailak nabarmen murriztu ziren. Une honetan, maila horiek hiri-inguruneetarako normalak diren tarteetan daude; beraz, laginketa bukatutzat joko da programatutako zikloa amaitu ondoren, Eusko Jaurlaritzako Osasun Publikoaren arduradunekin bat etorriz.

Amiantoari dagokionez, Osasun Publikoaren Laborategiak orain arte egindako analisi guztiak erreferentziazko balioak baino txikiagoak izan dira amianto-zuntzei dagokienez. Hala ere, bi puntutan egiten jarraituko da, Eitzagan eta San Lorenzo-Ermuan hain zuzen, martxoaren 30era arte. Era berean, zabortegiaren eremuko erreskate-taldearen kontrolen emaitzek ere erreferentziazko balioak baino txikiagoak izan arren, egiten jarraituko dira.