Ekosteguna: Erakundearen Ingurumen Aztarnarekin lotutako erronkak eta aukerak

Ekonomia zirkularrago baterantz joateak, non ahalik eta denbora gehien eutsi nahi zaion produktuen, materialen eta baliabideen balioari, lehiarako abantaila berriak sortzeko aukera irekitzen du. Horretarako, Europako Itun Berdeak ingurumen informazio fidagarri, konparagarri eta egiaztagarria edukitzeko beharra azpimarratzen du, erosleek erabaki jasangarriagoak hartu ahal izan ditzaten, eta produktuen eta erakundeen ingurumen aztarnaren metodoak proposatzen ditu horretarako sistema bateratu gisa.

Zentzu horretan, Europako Batzordeak metodo bateratu horiek bere politiketan txertatzeko konpromisoa hartzen du, hala nola taxonomiari buruzko erregelamenduan, produktuaren pasaporte digitalean edo kontsumo ekologikoaren konpromisoan, eta ETEei arreta berezia jartzeko beharra azpimarratzen du.

Baliteke ETEek ez izatea behar besteko ezagutza espezializaturik eta baliabiderik bizi zikloan ingurumen portaerari buruzko informazio eskaerei aurre egiteko. Beraz, enpresa horiek laguntza jaso beharko lukete, Batzordearen aldetik ez ezik, baita Estatu kideen eta industria elkarteen aldetik ere (2021eko abenduaren 15eko BATZORDEAREN 2021/2279 GOMENDIOA (EB), produktuek eta erakundeek euren bizi zikloan zehar duten ingurumen portaera neurtzeko eta komunikatzeko baliagarriak diren ingurumen aztarnaren metodoen erabilerari buruzkoa).

Ingurumen driver horri erantzun diote 2021eko ETE Zirkularreko dirulaguntza deialdiaren esparruan finantzatutako 3 proiektuk. Horietan, mugikortasun eta logistika, hondakinen kudeaketa eta tratamendua, eta lotura torlojuen sektoreetako 25 ETEk parte hartu dute.

• FEX eta Fastening Competence Center buru dituen Lotura Torlojuen azpisektoreko · “Ingurumen Aztarna Korporatiboa” proiektua enpresei beren jarduerari lotutako ingurumen inpaktuak ezagutzeko aukera ematera bideratu da, inpaktu foku nagusiak eta horien izaera identifikatuz, ingurumen errendimendua hobetzeko epe luzeko estrategiak diseinatzeko.
• Aclimak gidatutako “HAPRec” proiektua hondakinen kudeaketari lotutako prozesuen ingurumen aztarna kalkulatzera eta egiaztatzera bideratu da, egungo prozesuak kudeatzeko eta hobetzeko hainbat aukera ebaluatzeko tresna gisa. 
• Euskadiko Mugikortasun eta Logistika Klusterrak gidatutako proiektuak, berriz, Ingurumen Aztarna Korporatiboa (HAC) eta Karbono Aztarna Korporatiboa (HCC) kalkulatzeko ad hoc tresna bat garatzea erraztu du, 3. irismena duena, Klima Aldaketaren Espainiako Bulegoko Karbono Aztarnaren Erregistroan egiaztatuta eta jakinarazita (“Kalkulu” zigilua), Berotegi Efektuko Gasak Murrizteko Planarekin batera.

Enpresa parte hartzaileek nabarmendu dutenez, lizitazio publikoei ingurumen informazio zorrotzarekin erantzuteko behar gero eta handiagoa dago, eta horixe da faktore motibagarrietako bat, hain zuzen, transakzio komertzialetan balio katean zehar helarazten den ingurumen informazio eskaerari erantzuteko, sortzen ari den araudia betetzeari aurrea hartzeko eta lehiakideetatik bereizteko, eta baita jarduerari dagokionez barne ingurumen hobekuntzarako tresna gisa erabiltzeko ere.

Ekonomia Zirkularraren osteguna-Ekostegun honen helburua da, hain zuzen, FEX, Fastening Competence Center, Aclima eta Euskadiko Mugikortasun eta Logistika Klusterra buru dituzten eta horiek gidatutako ingurumen aztarna kalkulatzeko proiektuen ikaskuntza eta emaitzak partekatzea.

Ekonomia Zirkularraren osteguna-Ekostegun hau, beraz, Euskadiko balio kate guztietako enpresetako zuzendari eta ingurumen arduradunei zuzenduta dago