Portugalgo Ingurumen Agentziak (APA) Common Forum on Contaminated Land in Europe delakoaren udazkeneko bilera hartu zuen urriaren 7tik 9ra Lisboan, kutsatutako lurzoruen kudeaketaz arduratzen diren agintarien artean ezagutza eta lankidetza trukatzeko Europako sare nagusia. Euskadiren ordezkari gisa, Ihobek parte hartu zuen, Europa osoko administrazioetako, ingurumen-agentzietako eta ikerketa-erakunde publikoetako espezialistekin batera.

Eusko Jaurlaritzaren sozietate publikoak esperientziak eta ezagutzak partekatu ditu Europako hogei herrialde baino gehiagotako ordezkariekin

Bileran Austria, Belgika, Danimarka, Estonia, Finlandia, Frantzia, Alemania, Flandes, Islandia, Irlanda, Italia, Letonia, Lituania, Luxenburgo, Herbehereak, Norvegia, Portugal, Katalunia, Suedia, Suitza, Erresuma Batua eta Valoniako ordezkariak bildu ziren, Europako Batzordeaz gain.

Hiru lan-jardunaldietan, lurzorua babesteko Europako politikek dituzten erronka nagusietako batzuk jorratu ziren. Landutako gaien artean, honako hauek nabarmendu zituzten: etorkizuneko Lurzoruaren Zaintza eta Erresilientziari buruzko Legearen aplikazioa (Soil Monitoring Law), kutsatutako kokalekuak ebaluatzeko eta kudeatzeko irizpideak, induskatutako lurren kudeaketa eta berrerabilera, eta kutsatutako lurzoruak lehengoratzeari buruzko esperientzien trukea. Merezi du azpimarratzea Common Forumak laguntza ematen diola Europako Batzordeari estatu kideentzako jarraibideak egiteko arriskuen analisia aplikatzeari buruz, eta, horrela, Europa mailako irizpideak homogeneizatzen laguntzen du.

Topaketan Europako Lurzoruaren Zaintzari eta Erresilientziari buruzko Legearen hedapena, herrialde eta eskualde batzuek induskatutako lurzoruen kudeaketan egindako aurrerapenak eta azaleratzen ari diren substantziei lotutako erronkak izan dira hizpide

Programan, halaber, lurzoruaren osasunarekin eta deskontaminazio-teknikekin lotutako ikerketa- eta berrikuntza-proiektu europarrak aurkeztu ziren, bai eta Lisboako drainatze-proiekturako bisita tekniko bat ere, gaur egun Europan gauzatzen ari den klima-egokitzapenerako azpiegitura nagusietako bat. Jarduketa honek lurpeko tunel handiak eraikitzea aurreikusten du, muturreko fenomeno meteorologikoek eragindako uholde-arriskua murrizteko, eta obran zehar aplikatutako lurren eta hondeatutako materialen kudeaketa-jardunbideak bertatik bertara ezagutzeko aukera eman zuen.

Ihobek sare horretan duen presentziari esker, gainera, Europar Batasuneko politiken eta araudien bilakaera zuzenean ezagutu daiteke, eta kutsatutako lurzoruak prebenitzeko eta birgaitzeko irtenbide berritzaileak garatzen lagundu.