Ihobe sozietate publikoak, APIArekin (Ingurumen Informazioko Kazetarien Elkartea) lankidetzan, "Ingurumen-komunikazioaren Eskola 2026. Klima-narrazioak: ekintzarako kontakizunak" ekimena antolatzen du. Jardunaldia irailaren 10ean egingo da, EHUren Udako Ikastaroen (UIK)  esparruan, eta komunikazioak trantsizio energetiko eta klimatikoan duen zeregina aztertuko du. 

Ingurumen-Komunikazioaren Eskolaren zortzigarren edizioa komunikazioari eta ingurumenari buruzko hausnarketarako eta eztabaidarako gune gisa finkatu da. Edizio honetan klima-narratibek ingurumen-erronken pertzepzio sozialean nola eragiten duten eta aldaketak sortzen nola lagun dezaketen aztertuko du, ezagutza, emozioa eta ekintza uztartuz. 

Jardunaldia publiko orokorrari, unibertsitateko eta unibertsitatetik kanpoko ikasleei, irakasleei, kazetariei eta komunikazioko, hezkuntzako eta ingurumen-sektoreko profesionalei zuzenduta dago. Programak komunikazio klimatikoaren, storytelling-tekniken, komunikazio parte-hartzailearen eta formatu berrien joerak aztertuko ditu, ingurumen-erronkak hainbat publikori hurbiltzeko. 

Jarduerak hausnarketa-saioak, elkarrizketak eta dinamika parte-hartzaileak uztartuko ditu. Aurrez aurreko modalitatean bertaratzen diren pertsonek Plaiaundiko (Irun) Ekoetxea Txingudira bisita egin ahal izango dute, eta online parte hartzen dutenek, berriz, klima-komunikazioko estrategia berriei buruzko tailer espezifikoa izango dute.

Ikastaroa irailaren 10ean izango da, Donostiako Miramar Jauregian, 09:00etatik 18:30era, eta interesdunek esteka honen bidez eman dezakete izena Ingurumen-komunikazioaren Eskola 2026. Klima-narrazioak: ekintzarako kontakizunak

Jardunaldiaren egitaraua

Jardunaldia 09:00etan hasiko da "Sonidos de la naturaleza" saioarekin. Protagonista Carlos de Hita Moreno izango da, SER kateko kolaboratzailea, komunikatzailea eta idazlea, APIAko presidentea den María García de la Fuentek zuzendutako elkarrizketa eskainiz. 

Programak "Naturaleza en pantalla" saioarekin jarraituko du. Bertan Lexeia Larrañaga del Valek, AVIS Producciones enpresako naturako zinema-zuzendariak eta Alex Gutiérrez Benítezek,  AVIS Produccioneseko naturako filmatzaileak, parte hartuko dute. Elkarrizketa Miren Amaia Goikoetxea Marquesek, Kazetarien Euskal Elkarteko eta Elkargoko lehendakari eta dekanoak, zuzenduko du. 

Ondoren dinamika parte-hartzaile baten bidez Eskolak komunikazioarekin eta ingurumen-ekintzarekin lotutako hainbat esperientzia jorratuko ditu. Bertan honako hauek hartuko dute parte: Gorka Belamendia Cotorruelo, CEA-Gasteizko Ingurumen Ikasketen Zentroko Ingurumen Prestakuntza eta Zabalkunde Arloko teknikaria, herritarren ingurumen-aktibazioa aztertuko duena; Bakarne Atxukarro Estomba, Iruñerriko Mankomunitateko Komunikazio teknikaria, ekintza- eta komunikazio-esperientzia partekatuko duena; eta Mari Mar Alonso Martín, Eusko Jaurlaritzako Ingurumen Jarduketarako Sozietate Publikoko Ekintza Klimatikoko zuzendaria, kasu honetan EAE-ko Trantsizio Energetikoko eta Aldaketa Klimatikorako Herritarren Batzarra aurkeztuko duena

Goizeko saioa Luis Guijarro García APIAko ingurumen-kazetariaren ondorioekin amaituko da. Jardunaldiak arratsaldean jarraituko du, 16:00etatik aurrera, jarduera praktikoekin.

Jardunaldian komunikazioko, hezkuntzako eta ingurumen-arloko profesionalak bilduko dira narratiba klimatiko berriak aztertzeko, kontakizunek gizarte-mobilizazioan duten zeregina aztertzeko eta ingurumen-komunikazioari eta ekintza klimatikoari buruzko esperientziak partekatzeko. 

Aurrez aurreko modalitatean Mari Luz Gómez Fernándezek, Ihobeko Ekoetxea Sareko proiektu-buruak, Ekoetxea Txingudira egingo den bisitan lagunduko du. Online modalitatean Lucía Olivera Garcíak,  Komunikazio Klimatikoko eta Estrategiako aholkulariak, "Estrategia eta klima-narratiba berriak. Klimaz hitz egitea mobilizatzeko" tailerra  eskainiko du. 

Eskolaren edizio berri honekin  Ihobek eta APIAk ezagutza, emozioa eta ekintza konektatzeko gai den ingurumen-komunikazioa sustatzen dute klima-erronkak ulertzen laguntzeko eta trantsizio ekologiko partekaturantz aurrera egiteko. 

"Ingurumen-komunikazioaren Eskola 2026. Klima-narrazioak: ekintzarako kontakizunak” ekimenean parte hartu nahi dutenek esteka honen bidez formaliza dezakete inskripzioa: Ingurumen-komunikazioaren Eskola 2026. Klima-narrazioak: ekintzarako kontakizunak Eskolan izena ematea.