EiTBren “Bizi Natura” saioak Ingurumen Komunikazioaren Saria jaso du Euskal Kazetaritza Sarien 2026. edizioan. Sari hori Ihobek sustatu du, Kazetarien Euskal Elkartearekin eta Elkargoarekin batera, ingurumenaren dibulgazioaren eta sentsibilizazioaren garrantzia nabarmentze aldera. Urdaibaiko Biosfera Erreserban instalatutako 18 kameren bidez, telebista-saioak denbora errealean erakutsi du bizitza basatia, betiere dibulgazio zientifikoa, entretenimendua eta ingurumen-kontzientzia uztartuta. 

Aurtengo saria Brutal Mediak eta BBC Studiosek EiTBrentzat egindako “Bizi Natura” ekoizpenak jaso du. Erresuma Batutik kanpo egindako Springwatch formatuaren lehen egokitzapena izan da. Hiru astez, programak Urdaibaiko Biosfera Erreserba eta bertako padurak eta ingurunea agertoki natural bihurtu ditu, eta ikus-entzuleei hurbildu die bertako fauna, flora eta aberastasun naturala. 

Esperientzia honetan, 600.000 lagunek baino gehiagok bat egin dute Euskal Telebistarekin, eta ETB ON plataforman 12.500 ordu kontsumitu dira. 18 kameren hedapenari esker, denbora errealean jarraitu ahal izan da bizitza basatia, eta Urdaibai inguruko elementu natural berezienetako batzuk erakutsi dira.  

Ingurumen-komunikazioa bultzatzeko saria 

Ingurumen Komunikazioaren Saria, berez, Ihobe Ingurumen Jarduketarako Sozietate Publikoaren eta Kazetarien Euskal Elkargoaren lankidetzaren parte da; zehazki, hedabideetan ingurumen-informazioa sustatzeko eta komunikazioarekin lotutako profesionalen eta eragileen artean jasangarritasunaren balioak sustatzeko lankidetzaren parte. 

Kategoria hori 2019an sartu zen sarietan, eta ingurumen-kazetaritzaren berariazko aintzatespenetik hasi eta egungo Ingurumen Komunikazioaren Sarira arteko bilakaera izan du. Sariaren aintzatespena ingurumen-gaiei buruzko informazioa ematen eta arlo horretan sentsibilizatzen laguntzen duten hezkuntza, zientzia edo dibulgazioaren esparruetako beste eragile batzuengana ere zabal dadin eman zaio izen hori. 

Aurreko edizioetan Julen Rekondok (2019), Gorka Belamendiak (2020), Eva Caballerok (2021), Ramon Bustamantek (2022), Iñaki Petxarromanek (2023), Jokin Aldazabalek (2024) eta “Natura Bizia” dokumentalak (2025) jaso dute saria. 

Olatz Barriuso, 2026ko Euskal Kazetariak Saria 

"Bizi Natura" sariarekin batera, 2026ko Euskal Kazetaritza Sariek Olatz Barriuso Santamariari eman diote 2026ko Euskal Kazetariak Saria. 2000. urteaz geroztik, El Correoko Politika saileko erredaktorea eta 2021. urteaz geroztik korrespontsal politikoa izan da Barriuso, eta bere ibilbide profesionala kronikaren eta analisi politikoaren esparruan garatu du batik bat. EiTBko eta Radio Euskadiko kolaboratzailea ere bada 2009. urteaz geroztik. 

Hamabosgarren edizio honetako palmaresean, halaber, Nieves Concostrina kazetari eta idazlea dago —Adierazpen Askatasunaren Jose Maria Portell Saria jaso du—, baita Santiago Segurola ere —Ibilbide Profesionalaren Saria jaso du, kirol-kazetaritzarekin lotutako ibilbidea aitortuta—. 

Paco Etxeberria mediku forentseari Pertsonaia edo Giza Instituzioa saria eman diote; Jose Miguel Rodriguez Martinez argazkilari arabarrari Juantxu Rodríguez Fotokazetaritza Saria; eta Cadena SER kateko “Las Voces de Kepa Junkera” podcastari Kazetaritza Digitala eta Narratiba Berriak saria. 

Ohorezko Saria Mikel Ezkerrori eman diote —joan den abuztuaren 10ean hil zen—. Sariaren bidez Euskal Herriaren historia, kultura eta gaurkotasuna Argentinan komunikatzen eta zabaltzen egindako lana aitortu nahi izan da. 

Sariak Euskal Kazetarien Elkarteak eta Kazetarien Euskal Elkargoak eman dituzte, BBK Fundazioaren, Ihoberen eta Bilboko Udalaren babesarekin. Epaimahaiak bi erakundeetako Zuzendaritza Batzordearen Batzorde Iraunkorreko kideak eta kazetaritza edo komunikazioko ikasketak ematen dituzten Euskadiko unibertsitateetako eta hedabideetako ordezkariak izan ditu. 

2026ko Euskal Kazetaritza Sariak emateko ekitaldia azaroaren 4an izango da, 19:00etan, Bilboko Kale Nagusiko BBK Aretoan.