Maruri-Jatabeko Udalaren lokal batean txikizkako denda "berde" bat jartzeko emakida pribatiborako baldintza-orrian ingurumen-irizpideak sartzea

Aukera ikustea

Maruri-Jatabeko Udalak merkatua aztertu zuen 2015ean, eta, azterketa horretan, herritarrek elikagai-produktuak herritik irten gabe erosteko premia zutela hauteman zuen.

Herritarrei zerbitzu hori ematen zien merkataritza-establezimendurik ez zegoenez, sendotuz joan zen ekintzailetzaren bidez denda bat irekitzen laguntzeko ideia. Ezaugarri bereizgarri batzuk edukiko zituen elikagai-denda txiki bat, ikerketan jasotako kontsumo-ohiturekin bat egingo zuena: ordutegi egokitua, oinarrizko produktuen eta tokiko produktu freskoen eskaintza, produktu ekologikoak...

2016an, baldintza-orria egiteko prozesuan, eta erosketa eta kontratazio berdearen arloan jasotako prestakuntzan inspiratuta, ingurumen-irizpideak sartzeko aukera ikusi zen udalean. Ihobek baldintza-orrietan ingurumen-irizpideak sartzeko zerbitzua eskaintzen du, eta udalak zerbitzu hori eskatu zuen. Udalaren osoko bilkuran, osorik aztertu eta onartu zen Ihoberen proposamen teknikoa. Ezarritako betekizunak betetzen zituen proposamen bakarra aurkeztu zen lizitaziora.

Prozesu horren ondorioz, dendak 2017ko ekainaren amaiera aldean ireki zituen ateak. Maruri-Jatabeko udaletxearen ondoan dago, udaleko igerilekuen eta gimnasioaren eraikinean. Bere eskaintzan, oinarrizko produktuak –batzuk ekologikoak–, tokiko produktu ekologikoak –inguruko ekoizleenak– eta izozki, irabiaki eta pizza artisauak daude, besteak beste.