Let 's Clean Up Euskadi! kanpainak herritarrak, ikastetxeak, enpresak, elkarteak eta administrazio publikoak mobilizatzen jarraitzen du, ingurune garbiago eta osasungarriago batzuk edukitzeko. Ihobek —Eusko Jaurlaritzaren Ingurumen Kudeaketarako Sozietate Publikoak— sustatu du kanpaina, Let 's Clean Up Europe ekimen europarraren esparruan, eta hondakinak ez botatzeko eta ingurunea zaintzeko erantzukidetasun handiagoa sustatzeko garbiketa eta ingurumen-sentsibilizazioko ekintzak bultzatzen ditu.

2.200 pertsonak baino gehiagok parte hartu dute aurten Euskadi osoan bultzatutako garbiketa-ekintzetan, naturaguneak eta hiri-espazioak zaintzen laguntzeko eta hondakinen prebentzioaren inguruan sentsibilizatzeko

2026an, ekimenak jarduera ugari izan ditu lurralde osoan. Orain arte, 18 erakundek 44 garbiketa-ekintza sustatu dituzte hondartzetan, ibaietan, mendietan, parkeetan eta Euskadiko beste naturagune eta hiri-ingurune batzuetan. Guztira, 2.225 boluntariok parte hartu dute, eta botatako 9.000 kilogramo hondakin baino gehiago erretiratzen lagundu dute. 

Emaitza kuantitatiboetatik harago, kanpainak funtsezko helburu bat du: hondakinik gabeko espazioak kontserbatzearen garrantziaz sentsibilizatzea eta ohitura jasangarriagoak sustatzea kontsumoari, prebentzioari eta baliabideen kudeaketa egokiari dagokienez. 

Ekimenak mugarri nabarmena izan zuen joan den ekainaren 6an, Ingurumenaren Mundu Egunarekin bat eginez; egun horretan, hondakinak eta mikroplastikoak bildu ziren hainbat ingurune naturaletan eta hondartzatan, hala nola San Antonio hondartzan, edo Ekoetxea Euskadiko Ingurumen Zentroen Sarean hainbat ekintza burutu ziren.

Let 's Clean Up Euskadik aktiboki mantentzen du herritarren mobilizazioa urte osoan zehar hondakinik gabeko inguruneen alde

Gainera, berrogeita hamar bat erakundek, ikastetxek eta enpresak bat egin dute ekimenarekin, bilketa eta ingurumen-sentsibilizazioko ekintza berriak bultzatuz.

Hondakinak botatzeari aurre egiteko ekintza kolektiboa

Urtero, milioika tona hondakin botatzen dituzte mundu osoko naturaguneetan. Errealitate horrek lotura estua du produkzio- eta kontsumo-eredu ez oso jasangarriekin, baita hondakinak littering edo botatzeak sortzen dituen ingurumen-ondorioen inguruko kontzientziazio-faltarekin ere. 

Erronka horren aurrean, Let’s Clean Up Euskadi!-k herritarren parte-hartzea bultzatzen du, lurraldearen gainean zuzenean jarduteko eta, aldi berean, arazoaren arrazoiei buruzko hausnarketa sortzeko tresna gisa. Garbiketa-ekintzek ingurunean dagoen hondakin-kantitatea eta -tipologia ikusteko aukera ematen dute, eta, horrela, portaera arduratsuagoak eta zirkularragoak sustatzeko.

Ihobek bultzatutako ekimenak ingurumen-kontzientziazioa indartzen du, eta dagoeneko 2026an 70 ekintza baino gehiago programatu dira lurralde osoan

Kanpainaren arrakasta hainbat erakunde eta boluntarioren inplikazioan oinarritzen da, urtez urte ekimena Euskadi osora zabaltzen laguntzen baitute. Horien artean, nabarmentzekoa da Nueva Acropolis Bilbao elkartea, Limpiar Paseando ekimena sustatzen duena. Duela gutxi, Bilbo inguruko hainbat naturagunetan garbiketa eta ingurumen-sentsibilizazioko jarduerak bost urtez jarraian egikaritu dituela ospatu du. Elkartearen lanak erakunde askoren etengabeko konpromisoa irudikatzen du; izan ere, lan horri esker, herritarren parte-hartzea ingurumen-ekintzetara bultzatzen da.

Kanpaina irekia urte osoan zehar

Kanpaina 2026 osoan egongo da martxan, eta lurraldeko hainbat udalerri eta naturagune garbitzeko ekintza gehiago jasotzen jarraituko du. Gaur egun, jada 74 garbiketa-ekimen programatu dira. Ekimen horiek mapa interaktibo baten bidez kontsulta daitezke. 

Ihobek herritarrak eta interesa duten erakundeak programatutako jardueretan parte hartzera edo garbiketa-jardunaldi berriak sustatzera animatzen ditu. Naturaguneen eta hiri-inguruneen kontserbazio-egoera hobetzen laguntzeaz gain, ekintza horiek aukera ematen dute ingurumen-sentsibilizazioa indartzeko eta hondakinen prebentzioarekin eta ekonomia zirkularrarekin konpromiso handiagoa duen gizarte baterantz aurrera egiteko. 

Kanpainari eta aurreikusitako jarduerei buruzko informazio guztia Ihoberen webgunean dago eskuragarri: https://www.ihobe.eus/eu/euskadi-garbia#lets-clean-up-euskadi.