BasquESG Eusko Jaurlaritzaren 2030 Euskadiko Industria Planean jasotako proiektu eraldatzaileetako bat da, eta ekimen horrek Euskal enpresa sarean eragin duen interesa nabarmen hazi da hura abiarazi zenetik. Une honetan, 112 euskal ETEk parte hartzen dute proiektu honetan, eta 2026. urtea amaitu aurretik 500 enpresetara iristea da helburua.

Ekimena azaroan jarri zen abian eta aurreikuspenak gainditu ditu: une honetan, 112 euskal ETEk parte hartzen dute proiektuan

Eusko Jaurlaritzak, euskal enpresa sarerako aukera estrategikoak ahalik eta gehien aprobetxatzeko apustuan, BasquESG ekimena jarri zuen abian joan den azaroan, Euskadiko enpresa txiki eta ertainen artean jasangarritasunaren ebaluazio eta informaziorako sistema bat zabaltzeko, enpresen lehiakortasuna eta posizionamendua hobetzeko.

ESG Environmental, Social & Governance (Ingurumena, Gizartea eta Gobernantza) ingelesezko hitzek osatutako sigla da, eta kontzeptu horren barruan biltzen dira erakunde batek bere ingurumen inpaktua, erantzukizun soziala eta gobernu korporatiboaren kalitatea kudeatzeko duen modua definitzen duten irizpideak.

Jardunean ESG ekintzak egiteak esan nahi du bezeroentzat, erakunde inbertitzaileentzat eta gizartearentzat epe luzeko balioa sortzeko gai den enpresa eredu etiko, garden eta jasangarriago baten alde egiten dela. Jasangarritasuna giltzarri den testuinguru global batean, ESG da enpresak aukerekin, konfiantzarekin eta etorkizunarekin konektatzen dituen hizkuntza arrunta.

Ekimenak informaziorako tresna estandarizatua eskaintzen die enpresa txiki eta ertainei, eta horrek merkatuan lehiakorrak izatea eta posizionamendu hobean egotea ahalbidetzen die

Beraz, Eusko Jaurlaritza gidatzen duen BasquESG ekimenak ekonomia lehiakorragoa, erresilienteagoa eta jasangarriagoa bultzatu nahi du, eta, horretarako, tresna praktikoak, trebakuntza eta laguntza espezializatua ematen dizkie enpresa txiki eta ertainei, jasangarritasunaren alorren egiten dutena hobetzeko, merkatuan duten posizionamendua indartzeko eta araudiek, finantzek eta balio kateak etorkizunean ezarriko dituen eskakizunei aurrea hartzeko.

Europako Batzordearen babesa

BasquESG ekimenak euskal enpresen artean izan duen harrera ona indartu egin da Europako Batzordeak Ihoberi LIFE proiektu bat esleituta, erakunde lider gisa, izan ere, proiektuak 1,28 milioi euroko aurrekontua du guztira, eta diru horretatik 768.153 euro Europako finantzaketatik datoz. 

Ihoberekin batera, Euskalitek eta Certinaliak ere hartzen dute parte LIFE proiektuan, erakunde bazkide ofizial gisa, bai eta erakunde elkartu talde zabal batek ere, tartean direla finantza erakundeak eta industria enpresa handiak. 

BasquESGrako sarrera irekia

BasquESG ekimenak etapa berri bati ekingo dio orain, eta euskal enpresa txiki eta ertain guztiei laguntza eskainiko die. Programa jasangarritasunean aurrera egiteko interesa duen edozein enpresa txiki eta ertainentzat da, Euskadiko ehun ekonomikoaren aniztasuna erakusteko.

BasquESG proiektua indartu egin da Europako Batzordearen LIFE programaren bidez esleitu zaion 768.000 euroko dirulaguntzari esker

Gainera, BasquESGn parte hartzeko eskaera handia dela eta, Ihobe sozietate publikoak, ekimenaren idazkaritza tekniko gisa diharduenak, parte hartzeko eskaera epea etengabe zabalik izatea erabaki du. Horrela, euskal ETEak edozein unetan sar daitezke BasquESGn, lotutako formazio eta laguntza zerbitzuak eskuratzeko. 

Nahi duten enpresek formulario honen bidez eman dezakete izena:

Iraunkortasuna ebaluatzeko proiektu pilotuan parte hartzeko eskaera