Alexander Boto Basteguietak, Ihobe Ingurumen Jarduketarako Sozietate Publikoko zuzendari nagusiak, eta Xabier Caño Gonzálezek, Aclima Basque Environment Cluster-eko lehendakariak, bi erakundeek Euskadiko ingurumen-politikaren helburuak lortzeko lankidetza-hitzarmena berritu dute.

Hitzarmen horren ondorioz, Ihobek eta Aclimak 2028ra arte hainbat jarduera-ildo garatuko dituzte. Horien artean, nabarmentzekoak dira plastikoak, lurzoruak eta zuntz-zementua tratatzeko eskura dauden teknologiak identifikatzea, Euskadin ezartzeko jardunbide egokiak identifikatuta; hondakinak balorizatzeko azpiegituren instalazioa sustatu eta arintzeko irtenbideak elkarrekin bilatzea; lurzoruak erremediatzeko lantaldea dinamizatzea, teknologia berritzaileen aplikazioan aurrera egiteko, eta euskal enpresen gaitasun teknologikoak eta horien aplikagarritasuna identifikatzea. 

Gainera, Euskadiko industriak airearen kalitatea, zarataren kontrola eta uren kudeaketa eta tratamendua hobetzeko, kutsadura prebenitzeko eta kontrolatzeko eskura dauden teknologietan duen gaitasunaren analisia egiten ere lan egingo dute.

Euskadiko ingurumen-sektoreko industrien lehiakortasuna hobetzeko halako akordioak garrantzitsuak direla aipatu dute bi erakundeek

Horretarako, Aclimak ingurumen-sektorea ordezkatuko du Ihoberen aurrean, eta erakunde bitartekari gisa jardungo du. Sozietate publiko horrekin lankidetzan arituko da sektorekako informazioa biltzen, Euskadiko ingurumen-sektoreak hainbat ekimenetan duen parte-hartzea dinamizatzeko. Ihobek, berriz, Aclimaren bidez bideratuko ditu ingurumen-sektorerako ikuspegia eta aukerak, eta sektore horren Euskadiko erreferentziazko erakunde preskriptore eta ordezkari gisa jardungo du.

Alexander Boto Ihobeko zuzendari nagusiak “lankidetza-hitzarmenak sinatzearen garrantzia” azpimarratu du, eta, adierazi duenez, “ingurumen-industrien euskal klusterra funtsezko aliatua da ingurumen-sektorearen beharrak eta gaitasunak politika publiko eraginkorragoetara eta Europako helburuekin bat bideratzeko.Akordio hau ekintzaren aldeko apustu irmoa da.Euskal ingurumen-sektorea Euskadiko trantsizio ekologikoan eragile estrategikoa izatea nahi dugu”. 

Hondakin-korronteen kudeaketaren berrikuntza izango da bi erakundeek elkarrekin egingo duten jardueretako bat

Bestalde, Xabier Caño Aclimako presidenteak lankidetza publiko-pribatuaren garrantzia azpimarratu du. “Aclimak ingurumen-sektoreko industrien lehiakortasuna hobetu nahi du, sektoreko eragileen arteko lankidetza sustatuta, tokiko eta nazioarteko negozio-aukera berriak garatuta, eta ingurumen-arloko berrikuntza sustatuta. Ildo horretan, lankidetza-hitzarmen honek esparru egokia eskaintzen digu”.