Basoinsa, Vicinay Sestao, A&B Laboratorios de Biotecnología, Eroski, Compo Global Solutions, Metallo, Ekomodo eta Grupo Celulosas Moldeadas enpresek irabazi dituzte Euskadiko saileko 2020ko Europako Ingurumen Sariak. Urtero egiten du sarien deialdia Europako Batzordeak, negozioen bideragarritasun ekonomikoa eta ingurumenaren babesa arrakastaz uztartzen dituzten enpresak nabarmentzeko.

Basoinsa ingurumen-aholkularitzak "Garapen Jasangarrirako Nazioarteko Lankidetza" saria jaso du Euskadin, Cundinamarcako (Kolonbia) Chicú ibaiaren ingurabidearen ingurumen- eta ekologia-hobekuntzarako egindako lankidetza-proiektuagatik.

Basoinsak sari horietako irabazle izatea lortu du estatu mailan, eta, horri esker, Bruselan lehiatu ahal izango da Europa mailako sari hori lortzeko ekainaren hasieran. 

Basoinsak lortutako saria Cundinamarcan (Kolonbia) egindako lankidetza-proiektu bati esker izan da. Proiektu horren helburua da Chicú ibaiaren –Bogotá ibaiaren adarra– ingurabidearen ingurumen-berreskuratzea, 16 km eta 983.330 m2-ko tarte batean, Tenjo udalerritik pasatzen den lekuan.

Garapen jasangarrirako kudeaketa

“Garapen jasangarrirako kudeaketa” kategorian, berriz, Vicinay Sestaok lortu du saria enpresa ertain eta handietan, “Bizi-zikloaren azterketa” eginez, erakundearen jarduerak edo hornitzaileek sor ditzaketen nahiz hornitzaileengan sor daitezkeen ingurumen-alderdiak eta -inpaktuak ezartzeko bitarteko gisa. Enpresak konponbideak eskaintzen ditu offshore munduan flotatzen duten gailuak ainguratzeko–batez ere oil and gasen erauzketan, esplorazioan eta ekoizpenean dihardutenak– eta itsas zabalean energia eolikoa sortzeko.

Kategoria honetako accesita Industrias de Turbo Propulsores enpresarentzat izan da, apustu handia egin baitu garapen teknologikoaren eta I+G arloko inbertsioaren alde. Nabarmentzekoa da Union European Clean Sky 2 ikerketa-programan parte hartu duela: proiektu horretan 40 milioi euro baino gehiago inbertitu dira. 2018an, ITP Aero enpresak Clean Sky 2 enpresaren motorren arlo teknologikoaren urteko berrikuspena hartu zuen Madrilen. Berrikuspen horren helburua CO2 gasen isuriak eta hegazkinek sortutako zarata-mailak murriztea da.

Garapen Jasangarrirako Produktuak eta Zerbitzua

“Garapen Jasangarrirako Produktua eta Zerbitzua” kategoriaren barruan, A&B Laboratorios de Biotecnología enpresak lortu du saria mikroenpresen eta enpresa txikien arloan. Enpresak ekodisolbatzaileak izeneko produktu-sorta aurkeztu zuen. Halako produktuak garbiketa- eta koipegabetze-prozesuetarako industria-sektorera bideratzen dira, eta ohiko disolbatzaile arriskutsuak baino eraginkorragoak, erabiltzeko seguruagoak, ingurumenaren aldetik onuragarriagoak eta balio erantsi handiagokoak dira.

Kategoria honetan, Recircular Servicios Ambientales enpresak accesita lortu du baliabideen transakzioen jasangarritasuna ebaluatzeko aukera emango duen aplikazio bati esker, inpaktua ingurumenaren, ekonomiaren eta gizartearen ikuspegitik kalkulatuz.

Enpresa ertain eta handietan, Eroskik saria jaso du arrantza-jardueran eta arrainaren banaketa jasangarrian egindako lanagatik. Jarduera horri esker, Espainiako txikizkako lehen banaketa-katea izan da arrantzategi jasangarrietatik datorren arrain freskoaren auditoria gainditzen, tokiko arrantzaleen kofradiekiko konpromisoaren bidez.

Garapen jasangarrirako prozesuak

"Garapen jasangarrirako prozesua" kategorian, Compo Global Solutions enpresak jaso du mikroenpresa eta enpresa txikientzako saria, bere konpostaje-teknologia berritzaileagatik. Enpresak proposatu zuen konpostaje-prozesua hobetzea teknologia berritzaile baten bidez, azpiproduktu organikoen tipologia guztiak balorizatzeko aukera ematen duena. Konponbidearen helburua da material horien tratamenduak ingurumenean duen inpaktua murriztea eta ongarri mineralen ordez kalitate handiko ongarri organikoak sortzea.
  
Bestalde, Metallo Spain-ek saria lortu du enpresa ertain eta handietan, metal astunak dituzten material konplexu ez-burdinazkoak balorizatzeagatik, prozesu metalurgiko patentatuaren bidez. Kobre-eduki txikia dutenez beste prozesu batzuek nekez baloriza ditzaketen materialetatik abiatuta, enpresak kobre beltza sortzen du (Cu ˜ % 80), eta Metallo taldearen barruan fintzen amaitzen du, berriz ere hondakinen metalak balio-katera itzuliz.

Ekonomia zirkularra

Azkenik, Ekonomia Zirkularraren kategorian, Ekomodo Sustainable Company enpresak lortu du saria mikroenpresen eta enpresa txikien kategorian, plastikozko hondakinak erabiliz ordenagailuetarako eta tabletetarako zorroak, poltsa berrerabilgarriak, saguetarako alfonbrak, estutxeak eta boligrafoak diseinatzegatik eta garatzeagatik. Ekomodo enpresak beste erakunde eta erabiltzaile batzuentzako produktuak eta osagarriak egiten ditu, hondakin plastiko birziklatutik abiatuta.

Enpresa ertain eta handien atalean, Grupo Celulosa Moldeadas (CEMOSA) enpresak saria lortu du fruta eta barazkietarako ontzi bati esker, paper birziklatuko zuntzak eta nekazaritza-hondakinen zuntzak moldekatuz egina. Ontzia film konpostagarriarekin termozigilatu ahal izango litzateke, beharrezkoa izanez gero. Ezaugarri horiek direla eta, karbono-aztarna txikiagoa sortzen du beste ontzi batzuen aldean.