Euskal Herriko Agintaritzaren Aldizkariak (EHAA) Industria, Trantsizio Energetiko eta Jasangarritasun Sailaren laguntzen agindu berri bat argitaratu du gaur, euskal toki erakundeek sustatutako jasangarritasun proiektuak bultzatzeko. Deialdiak 4 milioi euroko zuzkidura ekonomikoa du, eta klima aldaketaren eta biodibertsitatearen galeraren erronkei aurre egiteko udalerri erresiliente, jasangarri eta prestatuagoetarantz joatea bultzatzen duten ekimenak laguntzea du helburu.

Eskaerak urriaren 30etik azaroaren 30era aurkeztu ahal izango dira, biak barne, horretarako gaitutako kanalen bidez. Edizio honetako berrikuntza nagusietako bat aurrekontu zuzkidura ia %54 handitzea da. Horri esker, lurraldean tamaina eta gaitasun eraldatzaile handiagoko proiektuak finantzatu ahal izango dira, eta, hala, Euskadiko trantsizio ekologiko eta klimatikoan toki entitateek duten zeregina indartuko da.

Agindu berriak 4 milioi euroko zuzkidura du, azken urteetako handiena, irismen eta ingurumen inpaktu handiagoa duten tokiko jarduerak laguntzeko. Bihar, urriaren 30ean, informazio jardunaldi bat egingo da aurkezpena egiteko

Deialdi honen aurrekontua indartzeko aukera izan da, hain zuzen, laguntzek aurreko urteetan egindako ibilbide positiboari esker. Zehazki, azken deialdian lagundutako jarduerak ingurumen onura ukigarriak sortzen ari dira, eta, horren ondorioz, 1.500 tona CO₂ baino gehiago xurgatu dira, espazio degradatuen 150.000 m² baino gehiago berreskuratu dira eta habitat naturalen 64 hektarea inguru hobetu dira. Emaitza horiek agerian uzten dute tokiko ekintzak eraldatzeko daukan gaitasuna, bai eta klima aldaketara egokitzeko, natura ondarea kontserbatzeko eta Euskadiko azpiegitura berdea hobetzeko egiten duen ekarpena ere. 

Agindu berriak, halaber, azken hilabeteetan egindako berrikuspen juridikoaren prozesuaren ondorioz gauzatutako hainbat doikuntza jasotzen ditu. Testuinguru horretan, aurreko deialdietan zeuden ildo batzuk ezabatu egin dira, toki erakundeen eskumen propioei lotuta daudela uste baita, Euskadiko Toki Erakundeei buruzko 2/2016 Legeak (ETEL) ezarritako irizpideekin bat etorriz.

Jardunaldia jasangarritasunarekin lotutako ekimenen kudeaketan parte hartzen duten toki erakundeetako teknikariei eta arduradunei zuzenduta dago.

Eguneratze horrek deialdiaren segurtasun juridikoa indartzea ahalbidetuko du, eta baliabideak Aginduaren eskumen esparrura eta Natura Ondare eta Klima Aldaketara Egokitzeko Zuzendaritzaren lehentasunetara ondoen egokitzen diren jarduerei bideratzeko aukera emango du.

Edizio honetako berrikuntzak jakinarazteko eta eskaerak prestatu eta aurkeztearekin lotutako zalantza nagusiak argitzeko, Eusko Jaurlaritzak, Natura Ondare eta Klima Aldaketara Egokitzeko Zuzendaritzaren bidez, informazio jardunaldi bat egingo du bihar, urriaren 30ean. Saio horretan, deialdian egindako aldaketa nagusiak aurkeztuko dira, alderdi tekniko eta juridiko garrantzitsuenak, bai eta diruz lagun daitezkeen proiektuak behar bezala definitzeko eta izapidetzeko gakoak ere. Jardunaldia jasangarritasunarekin lotutako ekimenen kudeaketan parte hartzen duten toki erakundeetako teknikariei eta arduradunei zuzenduta dago.