Eusko Jaurlaritzak, 2026an, ekonomia zirkularreko 25 industria-proiektu babestuko ditu, eta horietan Euskal Autonomia Erkidegoko 78 industriek parte hartuko dute. Deialdiak 1,5 milioi euroko zuzkidura izango du, eta enpresa txiki eta ertainen ekodiseinuko, ekoberrikuntza estrategikoko eta trantsizio zirkularreko ekimenak bultzatuko ditu. Hiru laguntza-lerroen aurrekontua agortu da, 33 eskaera jaso ondoren. 

 Proposamenek bilatzen dute hondakinak baliabide bihurtzea, produktu berrietan material birziklatuak erabiltzea eta lehengai kritikoekiko mendekotasuna murriztea. Industria Europako etorkizuneko ingurumen- eta ekonomia-eskakizunetara egokitzeari eta Euskadiren autonomia estrategikoa indartzeari ere heltzen zaio. 

Eusko Jaurlaritzak enpresa txiki eta ertainen ekodiseinuko, ekoberrikuntza estrategikoko eta trantsizio zirkularreko 25 proiektu finantzatuko ditu 1,5 milioi euroko zuzkidurarekin

 Aurkeztutako 33 proiektuetatik 25ek lortuko dute finantzaketa. Eskariak hiru lerroetako bakoitzean aurreikusitako zuzkidura agortu du. Hala, Ekodiseinua eta Ekonomia Zirkularreko Erakustaldia lineak, 300.000 euroko zuzkidura duenak, 13 proiektu jaso zituen eta 10 finantzatuko ditu osorik. Ekoberrikuntza Estrategikoak 700.000 euroko zuzkidura du eta aurkeztutako 8 proiektuak babestuko ditu. Enpresa txiki eta ertain zirkularrak 500.000 euroko zuzkidura du eta 12 proposamen jaso zituen; horietako 7 finantzatuko ditu. 

 2026ko ekonomia zirkularreko berrikuntzarako dirulaguntzen deialdiari dagokio ebazpena.  

Mendekotasun txikiagoa, industria-balio handiagoa 

 Aurkeztutako proiektuetan, ekonomia zirkularrak Euskal Autonomia Erkidegoko industrian dituen zenbait aplikazio ikus daitezke. Planteatzen dute balio handiko materialak berreskuratzea eta berrerabiltzea, ekoizpen-prozesuetan bigarren mailako baliabideak erabiltzea eta hondakinak lehengai berri bihurtzea. Soluzio horiek kanpoko baliabideekiko mendekotasuna murriztu dezakete, eta lagungarriak izan daitezke industria-sektoreek Europako etorkizuneko ingurumen-eskakizunei aurrea har diezaieten. 

Hiru ildo horien aurrekontua agortu da: 33 proiektu aurkeztu ziren eta 25ek lortuko dute finantzaketa

 Aurreko deialdietan, 9,4 milioitik gorako inbertsio pribatua  

 Aurreko deialdien ebaluazioaren arabera, lagundutako proiektuek 9,4 milioi eurotik gorako inbertsio pribatua mobilizatu dute, eta zuzeneko 400 lanpostu baino gehiago sortzen lagundu dute. Emaitza horiek erakusten dute zein den berrikuntza zirkularra industria-jarduerara eramateko laguntzen bidea. 

Laguntza horiekin, Euskadik jasangarritasuna, industria-lehiakortasuna eta autonomia estrategikoa eskutik hartuta aurrera egiten duten eredua indartzen du

 2020-2023 aldirako programaren ebaluazio-txostenak, halaber, erakunde onuradunek emandako informazioan oinarrituta zenbatetsitako ingurumen-emaitzak jasotzen ditu. Analisi horren arabera, lagundutako proiektuek urtean 813.257 tona CO₂ saihestuko zituzten, baita urtean 1.003.749 tona material aurreztu eta urtean 1.253.492 tona isurketa murriztu ere.  

2026an hautatutako proiektuek zenbait erronkari erantzuten diete, hala nola lehengai estrategikoak berreskuratzeari, hondakinak balorizatzeari eta ekoizpenean bigarren mailako materialak erabiltzeari

 2026an hautatutako proiektuek zenbait erronkari erantzuten diete, hala nola lehengai estrategikoak berreskuratzeari, hondakinak balorizatzeari eta ekoizpenean bigarren mailako materialak erabiltzeari. Eskura dauden baliabideak hobeto aprobetxatzeak, bestalde, hornikuntza-kateak indartu ditzake, nazioarteko merkatuen ziurgabetasunekiko esposizioa murriztu dezake eta negozio-aukera berriak ireki ditzake Euskal Autonomia Erkideko industriarentzat.