Datozen Ekosteguna-Ekonomia Zirkularreko Ostegunetan, Ihobe sozietate publikoak jasangarritasunaren enpresa agendak markatuko dituen erronka nagusietako batzuk jorratuko ditu: ekonomia zirkularrari buruzko Europako araudi berria, ekodiseinua, ingurumen komunikazio zorrotza, klima aldaketara egokitzea, automobilgintzako zirkulartasuna, finantza jasangarriak, upcyclinga eta digitalizazioak trantsizio zirkularraren bizkortzaile gisa duen zeregina. Gai horiek izango dira Ihobek iraila eta abendua bitartean antolatutako online jardunaldi teknikoetako protagonistak.

Ekonomia zirkularrago, lehiakorrago eta erresilienteago baterantz trantsizioa egiteak eskatzen du erakundeek araudi aldaketei aurrea hartzea, irtenbide teknologiko berriak txertatzea eta erronka gero eta konplexuagoei erantzuteko gaitasunak garatzea. Helburu horrekin, Ihobek berriro ekingo dio Ekosteguna zikloari, ekonomia zirkularraren ostegunari, datozen urteetan enpresa jasangarritasuna definituko duten erronka eta aukerei aurre egiteko gako praktikoak eskainiko dituen programazio batekin.

Abendura arte aurreikusitako agendak euskal enpresen sarerako gaurkotasun handieneko gaietan jarriko du arreta. Saioetan gai hauek aztertuko dira: zirkulartasunaren arloko Europako legeen berrikuntzak, ekodiseinuaren eta teknologia garbien zeregina produktuak eta prozesuak hobetzeko, ingurumen komunikaziorako eskakizun berriak greenwashinga saihesteko, eta klima aldaketara egokitzeko eta erresilientzia industriala indartzeko estrategiak.

Programazioak jorratuko ditu, halaber, gai hauek: zirkulartasuna sektore estrategikoetan, hala nola automobilgintzan, egiten ari den aurrerabidea; Finantza jasangarrietarako Europako Taxonomiaren berrikuntzak; upcyclingak materialak eta hondakinak balorizatzeko eskaintzen dituen aukerak; eta digitalizazioaren potentziala eredu zirkularren ezarpena bizkortzeko tresna gisa.

Online jardunaldi tekniko horien bidez, Ihobe sozietate publikoak ezagutza espezializatua, tresnak, esperientziak eta kasu praktikoak hurbilduko dizkie enpresei eta profesionalei, ekoberrikuntza, lehiakortasun industriala, erresilientzia klimatikoa, baliabideen kudeaketa eraginkorra edo araudia betetzea bezalako funtsezko esparruetan irtenbide errealak aplikatzea errazago izan dezaten.

Ezagutza sortzeaz gain, Ekosteguna ekimenak administrazio publikoaren, enpresen, erakunde adituen eta eredu ekonomiko jasangarriago, berritzaileago eta lehiakorrago baterako trantsizioarekin konprometitutako beste eragile batzuen arteko topaketa gune izateko bokazioari eusten dio.

Programazioa  

Hauek dira urte amaiera arte aurreikusita dauden Ekosteguna jardunaldiak. Dagoeneko izena emateko epea irekita dago. 

• Irailak 24
  Zirkulartasun arloko lege berrikuntzak Europan eta lehentasunak 2026ko bigarren seihilekorako 
• Urriak 8
  Teknologia Garbien Euskal Zerrenda: produktua diseinatzeko eta prozesuak hobetzeko ekipo eraginkorrak 
• Urriak 22
  Greenwashinga saihestu eta merkatuan konfiantza sortu: Ingurumen komunikaziorako gakoak 
• Azaroak 5
  Teknologia Garbien Euskal Zerrenda: industriak klima aldaketara egokitzeko irtenbide teknologikoak 
• Azaroak 12
  Zirkulartasuna automobilgintzaren sektorean: 2026/1738 (EB) Erregelamendua, ibilgailuen bizitza baliagarriaren amaieraren diseinuari eta kudeaketari buruzkoa 
• Azaroak 26
  Finantza jasangarrietarako Europako Taxonomian aurrerapenak: aplikazio gidaren eguneratzea 
• Abenduak 3
  Teknologia Garbien Euskal Zerrenda: upcyclingerako irtenbide teknologikoak 
• Abenduak 10
  Smart Circularity: digitalizazioa zirkularitatearen bultzatzaile gisa 

Interesa dutenek euren intereseko saioetan jada izena eman dezakete.