Ihobek 2026ko udako ikastaroen programazioa aurkezten du, Euskal Herriko Unibertsitatearen Udako Ikastaroen esparruan egingo dena. Formazio eskaintzak honako ardatz hauek izango ditu: naturan oinarritutako konponbideak ingurumen hezkuntzarako tresna gisa erabiltzea, adimen artifizialean oinarritutako ingurumen neurketa, eta narratiba klimatikoak, egungo ingurumen erronkak jakinarazteko tresna gisa.

Konponbide naturalak eta ingurumen hezkuntza

Ihobek, uztailaren 2an, UIKen udako ikastaroen esparruan, aurrez aurreko formatuan antolatu duen Jasangarritasunerako Hezkuntzaren 2030eko V. Eskolak naturan oinarritutako konponbideen zeregina izango du ardatz, larrialdi klimatikoari eta hezkuntzaren esparrutik biodibertsitatearen galerari aurre egiteko funtsezko tresna gisa. Naturan oinarritutako hezkuntza: klima aldaketari aurre egiteko konponbide biziak (Educar desde la naturaleza: soluciones vivas frente al cambio climático) izenburupean, ikastaro honek hezkuntza espazioak diseinatzeko eta bizitzeko modua eraldatzeko beharra planteatzen du, klima egokitzapenean zein ongizate eta osasunean laguntzen duten birnaturalizazio irizpideak gehituz, batez ere haurren artean.

Ikastaroak aurrez aurre eta online egingo dira, eta izen emateak UIK Udako Ikastaroen Fundazioaren bidez egingo dira

Programak abiapuntutzat hartu du naturan oinarritutako konponbideek muturreko beroa eta pareko inpaktuak murrizteko, eskola inguruneetako ingurumen kalitatea hobetzeko eta espazio horiek ikasteko eta lurraldea zaintzeko eragile aktibo bihurtzeko dituzten aukerak. Lehendik eginda dauden esperientzien azterketatik harago, Eskolak ekimen horien integrazio pedagogiko handiagorantz aurrera egitea proposatzen du, aldaketa kulturalak eta sozialak sortzeko gai diren hezkuntza prozesu biziak baitira.

Eskola hau esplorazio eta diseinu laborategi gisa dago pentsatuta, eta parte hartzaileek aukera izango dute natura, klima, komunitatea eta ikaskuntza lotzen dituzten ekimenak aztertu, berrinterpretatu eta prototipatzeko. Ikuspegiak prozesu parte hartzaileetan eta horien balio hezitzailean jartzen du arreta, esku hartze fisikoetatik harago, ikastetxeak, udalerriak eta tokiko proiektuak ikaskuntza aktiborako, esperimentaziorako eta erabakiak hartzeko espazio gisa ulertuta.

Ikastaroan, hezkuntzaren, administrazioaren eta tokiko eragileen arteko lankidetza sustatuko da, proposamen aplikagarriak eta transferigarriak garatzeko. Eskolaren helburuetako bat da, hain zuzen, parte hartzaileei konponbide naturalei lotutako hezkuntza jarduerak diseinatzeko irizpideak eta gako praktikoak ematea, jolastoki eta eskola inguruneei buruzko begirada pedagogikoa indartzea, eta erantzunkidetasuna, pentsamendu kritikoa eta inklusioa bultzatuko duten prototipoak sortzea, egungo erronka klimatiko eta sozialekin eta Garapen Jasangarrirako Helburuekin koherentzian.

Ingurumen neurketa eta adimen artifiziala

Ingurumen Hezkuntzarako Eskolaren ondoren, irailaren 9an, Ingurumena neurtzeko tailerra: AA, ingurumena babesteko eta ebaluatzeko izeneko ikastaroa egingo da, EUSTATekin lankidetzan.

Ingurumena Neurtzeko Eskolaren bigarren edizioak jorratuko du, batetik, adimen artifizialak ingurumen adierazleen kalitatea, erabilgarritasuna eta aurreikusteko gaitasuna hobetzeko duen potentziala, eta, bestetik, Euskadiko ingurumen erronka nagusiei eta horien inplikazio ekonomiko eta sozialei aurre egiteko konponbide berritzaileak sortzeko egiten duen ekarpena. Era berean, formazioak azpimarratu nahi du zeinen garrantzitsua den herritarrei zuzendutako komunikazio garden eta zorrotza izatea, non ingurumen neurketa erabakiak hartzeko eta ingurunearen etengabeko hobekuntzarako ezinbesteko oinarria izango den.

Unibertsitateko ikasleei, irakasleei eta ingurumen sektoreko profesionalei zuzenduta daude

Ikastaroaren beste ardatzetako bat erakunde publikoen, komunitate zientifikoaren eta herritarren arteko lankidetza bultzatzea da, datu irekien kulturarantz eta adimen artifizialeko tresnen erabilera arduratsu baterantz aurrera egiteko. Ikuspegi horretatik, tailerrak ingurumen adierazleen aplikazio praktikoa bultzatu nahi du, bai ekintza publikoan bai eguneroko ekimenetan, eta, bide beretik, ingurumenaren kudeaketa eraginkorrago eta partekatuago baterako palanka gisa duen zeregina indartu.

Bai Ingurumena Neurtzeko Eskolak bai Jasangarritasunerako Hezkuntzak tailer praktikoak egingo dituzte.

Narratiba klimatikoak eta komunikazioa

Irailaren 10ean aurrez aurre zein online egingo den 2026ko Ingurumen Komunikazioaren Eskolak narratiba klimatikoak eta ekintzara mobilizatzeko horiek duten gaitasuna aztertuko ditu. “Krisi klimatikoa ez da erronka zientifiko eta politikoa bakarrik: erronka komunikatiboa ere bada. Klimaren gainean eraikitzen diren narratibek gizarteak premia, itxaropena eta jarduteko aukera nola hautematen dituen zehazten dute. Horregatik, 2026ko Ingurumen Komunikazioaren Eskolak ekintza klimatikorako hainbat narratiba aztertuko ditu, emoziotik eraldaketara pasatzeko, aldaketa errealak mugiarazi, inspiratu eta sortzen dituzten istorioak kontatzeko hainbat modu arakatuz”, Ihobetik adierazten dutenez.

Hiru udako eskola horietarako izen emateak zabalik daude Euskal Herriko Unibertsitateko Udako Ikastaroen webgunean.