Basque Green Talent programa zortzigarren ediziora iritsi da, eta indartu egin du trantsizio berdeari lotutako enplegu berrietan gazte talentu espezializatua sartzeko bide gisa duen zeregina. 2024ko ekainean abian jarri zenetik, 128 gaztek prestakuntza espezializatua jaso dute, eta 115ek praktika profesionalak egin dituzte. Aurtengo edizioan 21 profesional gazte prestatzen ditu, eta horietatik 19 enpresetan eta beste euskal erakunde batzuetan praktikak egiten hasiko dira, ekonomia zirkularrari eta deskarbonizazioari lotutako proiektuak garatzeko. 

Ihobek, Eusko Jaurlaritzaren Ingurumen Jarduketarako Sozietate Publikoak, eta Novia Salcedo Fundazioak sustatzen dute programa, Europako Gizarte Funtsarekin batera finantzatua, eta profesional gazteen gaikuntza eta euskal enpresa-sarearen ingurumen-beharrak lotzea du helburu.  

Zortzigarren edizio honetan 21 gazte graduatu berri ari dira parte hartzen, ekonomia zirkularrean, bizi-zikloaren analisian, erakundeen karbono-aztarnaren kalkuluan eta ekonomia jasangarrirako trantsizioari lotutako arriskuen ebaluazioan konpetentziak eskuratzen. Hemeretzik azaroaren 18an hasiko dituzte praktika profesionalak, eta ezagutza horiek benetako proiektuetara eramango dituzte.  

Ikaskuntzatik benetako proiektuetara 

Praktikak hainbat ingurune profesionaletan egingo dira, eta, horri esker, eskuratutako konpetentziak euskal enpresen eta erakundeen behar zehatzetan aplikatu ahal izango dira.  

Zortzigarren edizio honetan 21 gazte graduatu berriek hartuko dute parte, ekonomia zirkularrean gaitasunak eskuratzen ari direnak.

Basque Circular Hub-en eta Ihoben, parte-hartzaileek Basque Ecodesign Center-eko bazkide diren entitateen ekonomia zirkularreko proiektuetan eta ingurumena zaintzeko sisteman lagunduko dute, Hubek Bilbon, Gasteizen eta Arrasaten dituen egoitzetatik.  

Beste talde batek bitarteko eragileen eta sektoreko klusterren bidez lan egingo du, euskal ETEei beren karbono-aztarnaren 3. irismeneko emisioak kalkulatzen eta trantsizio-arriskuak identifikatzen eta kudeatzen laguntzeko. Gainera, zenbait pertsonak euskal enpresetan zuzenean garatuko dituzte proiektuak, ingurumen-metriketan eta txostengintzan oinarrituta.  

Talentu gaztea euskal industriaren trantsiziorako 

Programa-eredu honekin, Basque Green Talentek efektu bikoitza lortu nahi du: belaunaldi berriei gero eta eskari handiagoa duten ingurumen-esparruetan esperientzia profesionala ematea eta, aldi berean, euskal enpresa-sareari gaitasun tekniko espezializatuak hurbiltzea, bizi-zikloaren ikuspegia duten zirkulartasunari eta deskarbonizazioari dagokienez, bereziki.  

Horrela, ekimenak jarraipena ematen dio proiektu errealekin konektatutako ikaskuntza-ereduari. Aurreko deialdietan, konpetentzia berdeei buruzko prestakuntza teknikoa, enplegurako prestakuntza, lagun egitea eta esperientzia praktikoa uztartu dira jadanik, hala nola bizi-zikloaren analisiaren, karbono-aztarnaren edo enpresaren ingurumen-kudeaketaren esparruetan.