Ingurumenaren neurketa funtsezko tresna da ingurunearen bilakaera ezagutzeko, hobetzeko aukerak identifikatzeko eta politika publiko eraginkorrak bideratzeko. Testuinguru horretan adimen artifiziala bezalako teknologiak erabiltzeak ingurumen-datuen analisian aurrera egiteko eta erabakiak hartzeko ezagutza erabilgarria sortzeko aukera ematen du.

Helburu honekin Ihobe sozietate publikoak, EUSTATekin lankidetzan, "Ingurumen Neurketaren Tailerra: AA Ingurumena Babesteko eta Ebaluatzeko” tailerra antolatu du. jardunaldia irailaren 9an egongo da, Bilboko Bizkaia Aretoan (Abandoibarra etorbidea 3), 09:15etik 14:00etara. 

Tailerra irailaren 9an izango da Bilboko Bizkaia Aretoan, 09:15etik 14:00etara, eta interesdunek dagoeneko izena eman dezakete esteka honen bidez: Ingurumen Neurketaren Tailerra: AA Ingurumena Babesteko eta Ebaluatzeko tailerrerako izena ematea.

Jardunaldia Ihobeko Ingurumen Neurketaren Eskola Aurreratuaren ekimenaren barruan antolatzen da  eta adimen artifizialak ingurumen-adierazleak egiten, interpretatzen eta eboluzionatzen nola lagun dezakeen gogoa duten herritarrei, unibertsitateko ikasleei, irakasleei eta profesionalei zuzenduta dago. 

Tailerrean tresna hauek datu konplexuak aztertzeko, ingurumen-informazioko sistemak hobetzeko eta datu irekietan eta adimen artifizialaren erabilera arduratsuan oinarritutako kulturarantz aurrera egiteko eskaintzen dituzten aukerak jorratuko dira. Horretarako  ekimenak hitzaldiak, tailer praktikoak eta dinamika parte-hartzaileak datu errealekin eta aplikatutako tresnekin konbinatuko ditu. 

Programa hasteko Irantzu Sádaba Zubirik, Europako Ingurumen Agentziako Eraldaketa Digitaleko eta Teknologia Zerbitzuetako unitateburuak, "AA Ingurumenaren Zerbitzura: Erronkak eta aukerak” hitzaldia eskainiko du.

Ondoren, datuei, gobernantzari eta ingurumen-monitorizazioari buruzko blokean sartuta, Belén Muñiz Villanuevak, EUSTATeko zuzendari nagusiak "Datutik erabakira: gobernantza eraginkor baterako gakoak” hitzaldia emango du eta María García Flechak, Ihobeko Estrategia eta Berrikuntza zuzendariak,"Euskadiko ingurumenaren egoeraren aurrerapena eta ingurumen-datuen monitorizazioko erronkak” gaia aurkeztuko du. Saioa Leire Elduayen Olletak gidatuko du.

Jardunaldiak herritarrei, unibertsitateko ikasleei, irakasleei eta profesionalei egokitutako hitzaldi eta tailer praktikoak konbinatuko ditu eta ingurumen-adierazleen bilakaera, datu konplexuen interpretazioa eta ingurumen-kudeaketa eraginkorragorantz aurrera egiteko erabakiak hartzerakoan aplikatzea bezalako gaiak aztertuko dira. 

Kafe-etenaldiaren ondoren "AA for Green Tailerrak: Pertsonak, Datuak eta Ingurumena Konektatzen" tailerrak garatuko dira hiru profiletara egokituta: ikasleak eta gazteak, administrazio publikoa eta herritarrak. 

“Ingurumenaren Detektibeak: Esploratu, Neurtu eta Aurkitu AArekin” ikasle eta gazteei zuzendutako tailerra Javier del Ser Lorentek eta Ibai Laña Aurrekoetxeak dinamizatuko dute; tailer honek ingurumen-datu sinplifikatuekin lan egiteko, patroiak eta anomaliak identifikatzeko, ondorio bisualak lantzeko eta adierazleetan oinarritutako escape room motako dinamika batean parte hartzeko aukera emango du. 

Administrazio publikoari dagokionez Marc Vilahur Chiaravigliok “Datutik erabakira: nola integratu adierazleak politika publikoetan” tailerra dinamizatuko du, ingurumenaren, gizartearen eta ekonomiaren adierazleen hautaketan, klima-politikako kasu errealen azterketan eta horiek plangintza-prozesuetan aplikatzean oinarrituta. 

Herritarrei zuzendutako tailerra, "Zure ingurua datuetan: nola irakurri eta interpretatu Euskadiko Ingurumenaren Egoera", Laura Santamaría Morenok dinamizatuko du. Saioari esker ingurumen-adierazleak eguneroko alderdiekin erlazionatu ahal izango dira, hala nola osasunarekin, mugikortasunarekin edo ongizatearekin; horrez gain, herritarren ekintzen eraginari buruzko simulazio bat egingo da, Ihoberen CO₂ kalkulagailua erabiliko da eta adituekin kontsultatzeko gune irekia egongo da. 

“Ingurumen Neurketaren Tailerra: AA Ingurumena Babesteko eta Ebaluatzeko” Tailerrean parte hartu nahi dutenek EHUren Udako Ikastaroen esteka honen bidez eman dezakete izena: Ingurumen Neurketaren Tailerra: AA Ingurumena Babesteko eta Ebaluatzeko tailerrean izena ematea.