Azkar ari da eboluzionatzen Europako helburu klimatikoekin hobeto lerratutako industria lehiakorrago eta erresilienteago bat lortzeko trantsizioa. Erronka horiei erantzuteko eta euskal enpresei laguntzeko, Ihobe Eusko Jaurlaritzaren Ingurumen Jarduketarako Sozietate Publikoak programa mardul bat antolatu du Ekoefizientziaren ostegunak edo Ekostegunak foroaren barruan. Ekostegunak euskal enpresa-sareari zuzendutako erreferentziazko foro teknikoak eta formakuntza saioak dira, eta haien helburua da ekonomia zirkularrak, deskarbonizazioak eta jasangarritasunak eragindako aldaketak ulertzea eta haiei aurrea hartzea.

2026an, Ekostegunak programak ikuspegi argi, praktiko eta aurreratua emango du enpresen lehiakortasuna baldintzatuko duten erregulazio berrikuntza nagusien, merkatu joeren eta tresna teknikoen inguruan, eta, hala, erraztu egingo da Europako esparru berrietara egokitzeko prozesua, bai eta berrikuntza eta posizionamendu estrategikorako aukerak identifikatzekoa ere. 2022tik, 2.500 pertsona baino gehiagok hartu dute parte ekimen honetan.

Ekonomia zirkularraren erronka nagusien inguruan egituratutako programa

Ekoefizientziaren ostegunak edo Ekostegunak gaikako saioen inguruan egituratzen dira. Saio horiek Euskadiko industriaren eta zerbitzu aurreratuen eraldaketa bektore nagusiak jorratuko dituzte apurka-apurka. Aurreikusitako saioen artean, hauek nabarmentzen dira:

• Industria-lehiakortasunerako Europako esparru berria eta Euskadiko ekonomia zirkularraren gakoak, bereziki erreparatuta Industria Itun Garbiari eta euskal produkzio-sarerako lehentasun estrategikoei.
• Araudia sinplifikatzea eta jasangarritasuna kudeatzea, eta aztertzea Omnibus Zuzentarauaren inplikazioak, bai eta reporting, arreta egoki, taxonomia eta CBAM alorretan izaniko aldaketak ere.
• Efizientzia materiala eta baliabideen erabilera, euskal ekonomiako material-fluxuen eta ekonomia zirkularraren funtsezko adierazleak aztertzetik abiatuta.
• Trantsizio- eta klima-arriskuak, enpresa-erabakiak hartzean ebaluatzeko eta integratzeko metodologiak eta gidak aurkeztuta.
• Ekodiseinua eta produktu jasangarria, produktuaren pasaporte digitalaren hedapena, ESPR Erregelamendua, ingurumen-etiketatzea eta merkatuaren eskakizun berriak landuz.
• Erosketa publiko berdea eta produktu jasangarrien eskaria, merkatuak eraldatzeko palanka gisa.
• Finantza jasangarriak, arreta berezia jarririk Europako taxonomiaren aurrerapenetan eta kalte nabarmenik ez eragiteko printzipioan (DNSH).
• Ekitaldi eta zerbitzu jasangarriak, Erronka Garbia eta beste zenbait ziurtapen-sistema barne.
• Ekonomia zirkularra ezartzea erakundeetan eta negozio-ereduetan, ISO arauen eta erreferentzia gisa baliatzen diren protokoloen eta esparruen bidez.
• Greenwashinga prebenitzea, kontsumitzaileak ahalduntzeko Europako zuzentarau berria indarrean jartzear dagoen honetan.
• Teknologia garbiak eta fiskalitate berdea, Teknologia Garbien Euskal Zerrenda eta hari lotutako pizgarriak eguneratuta.
• Industria-erresilientzia eta hornidura-arriskuak, testuinguru geopolitiko aldakorreko lehengaien segurtasuna eta hornitzaileekiko mendekotasuna aztertuta.

Lehen saioa: Apirilak 16

Ekonomia zirkularreko Ingurumen-zaintza Estrategikoko 2026ko Txostenaren aurkezpena

Ekostegunen 2026ko edizioa apirilaren 16an hasiko da, “Industria Itun Garbia eta industria lehiakortasunerako Europako esparru berria: Euskadiko ekonomia zirkularraren 10 gakoak 2026rako” jardunaldiarekin. Saio horretan, Basque Ecodesign Centerrek egindako Ekonomia zirkularreko Ingurumen-zaintza Estrategikoko 2026ko Txostena aurkeztuko da. Saio horrek araudi eta merkatu aldaketa garrantzitsuenen panoramika integratua eskainiko du zenbait arlotan, hala nola gardentasuna eta ESG posizionamendua, ekodiseinua, lehengaiak eta hondakinak, deskarbonizazio industriala, Zero Pollution estrategia eta finantza jasangarriak.

Ekoefizientziaren ostegunak edo Ekostegunak hauei zuzenduta daude bereziki:

• Industriako eta zerbitzu aurreratuetako enpresei.
• Arau eta merkatu baldintzak aurreratu behar dituzten ETEei.
• Jasangarritasun, ekodiseinu, berrikuntza, erosketa eta estrategiaren alorreko arduradunei.
• Sektore publiko, kluster, enpresa laguntzako erakunde eta bitarteko eragileei.
• Trantsizio prozesuetan industriari laguntzen dioten aholkularitz eta talde teknikoei.

Jardunaldi guztiak modu birtualean egingo dira, online eta goizeko ordutegian, parte hartzea eta kontziliazioa errazteko, eta dohainik izango dira, Ihoberen webgunean izena eman ondoren. Hain zuzen, Ihoberen agendan irekiko da saio guztietan izena emateko aukera arian-arian.

Ekostegunak programa Ihoberen beste ekimen batzuekin osatzen da. Izan ere, programa horiek gai batzuk sakonago lantzeko aukera ematen dute, hala nola jardunean dauden profesionalak prestatzeko programa edo Basque Circular Hub-eko gazteen eta enpresen arteko lankidetza-programak.