Ihobek Regions4Climate proiektuaren partzuergoaren urteroko bileran eta Uhinak Kongresuan parte hartu du, biak Ficoban, eta administrazioen, ikertzaileen komunitatearen eta arduradun publikoen artean gero eta gehiago partekatzen den ideia indartzeko balio izan du. Izan ere, "ebidentzia zientifikoa sendoa da, eta orain erronka lurraldeari egokitzeko proiektuen gauzatzea bizkortzea da".

Aste honetan, Ihobe sozietate publikoak klima-aldaketara egokitzeari buruzko bi topaketetan parte hartu du: Regions4Climate Europako proiektuaren partzuergoaren urteroko bileran, Txingudiko estuarioaren inguruan, eta Uhinak Klima Aldaketari eta Itsasertzari buruzko Nazioarteko VII. Biltzarrean, ikertzaileak, administrazio publikoak eta lurralde-eragileak biltzen dituena klima-aldaketaren inpaktuak aztertzeko eta kostaldeko eremuen erresilientzia handitzeko beharrezko erantzunak emateko.

Regions4Climate europar proiektuaren esparruan, Euskadik, topaketaren anfitrioi gisa, klima-aldaketara egokitzeko irtenbide berritzaileak garatzen eta erakusten laguntzen duten Europako hamabi eskualdetako ordezkariak hartu ditu. Urriaren 5etik 7ra bitartean, esperientziak trukatu dira, eta aurrera egin da erantzun praktikoen eraikuntzan, hainbat erronkari aurre egiteko, hala nola itsas mailaren igoerari, muturreko fenomenoei edo kostaldeko eremuen kalteberatasunari.

Ezagutza hori jarduera zehatzetara eramateko beharra ere izan da Uhinak-en ardatz nagusietako bat. Kongresuak izaera zientifikoa eta teknikoa du, eta udalerri eta eskualde gehiago bildu ditu edizio honetan, ikerketak sortutako ezagutza benetako egokitzapen-proiektuen diseinuari eta gauzatzeari hurbiltzeko.

Ihobek Uhinak-en parte hartzen du sortu zenetik, kongresuaren edukiak diseinatzen dituen eta eztabaidak itsasertzaren erronka nagusietara eta klima-egokitzapenera bideratzen dituen batzorde teknikoan parte hartuz

Saioen artean, Malake Muñoz Cachon-ek, Ihobeko teknikaria,  moderatutako administrazio publikoei eta klima-aldaketara egokitzeari buruzko mahaiak esku hartzeko esperientzietan eta udalek eta eskualdeek diagnostiko, azterlan eta egokitzapen-planak lurraldearen gaineko proiektu zehatz bihurtzeko duten zereginean oinarritu du eztabaida. Saioan, besteak beste, Zarauzko Udalak parte hartu du, eta LIFE Urban Klima 2050 proiektuaren esparruan garatutako jarduerak aurkeztu ditu, klima-inpaktuen aurrean tokiko erresilientzia areagotzen duten esku-hartzeetan egokitzapena nola gauzatu daitekeen erakutsiz.

Bestalde, Mari Mar Alonso Martín Ihobeko Klima Aldaketaren zuzendariak klima-gobernantzari buruzko mahaian hitz egin du, eta administrazioen arteko lankidetza indartzeko eta egokitzapen-neurrien ezarpena bizkortzeko beharra defendatu du. Bere hitzaldian nabarmendu duenez, "datu zientifikoak argiak diren bezala, dagoeneko jarduteko beharra ere argia da", eta azpimarratu du eskura dagoen ezagutza klima-aldaketaren eraginetarako udalerriak eta eskualdeak prestatzeko gai diren proiektu eta inbertsioetan gauzatu behar dela.

Bi topaketek aste berean izandako bat-etortzeak agerian uzten du egokitzapen-politiketan gero eta bilakaera nabariagoa izan dela: ezinbestekoa da ezagutza zientifikoa sortzen jarraitzea, baina lehentasuna da ezagutza hori jarduera frogagarri, erreplikagarri eta gauzagarri bihurtzea, lehendik dauden inpaktu klimatikoen aurrean lurraldeen erresilientzia handitzea ahalbidetuko dutenak.