Gaurtik aurrera (martxoak 16, astelehena) eten egin dira kontratazio publikoko eta dirulaguntzak emateko prozeduren epeak. Berriro ekingo zaio epeen zenbaketari Alarma Egoeraren Dekretuak indarra galtzen duen unean. Neurriak abian diren lanak egiteko epeei ere eragiten die, eta teknikariek zehaztuko dituzte kasuan kasuko xehetasunak, lan bakoitzaren ezaugarri berezien arabera. Era berean, ezinbesteko kasuetan izan ezik, kontratazio-plegu berririk ez dela argitaratuko ezarri da.

Hartutako beste neurrietako bat jendaurreko arretari dagokio: aurrez aurreko zerbitzuaren ordez telefono eta posta elektroniko bidez eskainiko da, edo bideokonferentzia nahiz bestelako tresna telematiko batzuen arreta bidez. Ondorioz, bulegoak itxita egongo dira kanpoko bisitetarako, eta, horrela, erakundekoak ez diren langileak ezingo dira bertan sartu. Ihobeko langile guztiek gaitasuna dute sare korporatibora urruneko sarbide bidez sartzeko eta telelanaren formatuan lan egin ahal izateko.

Ekintza nagusi hauek onartu dira, besteak beste: kontratazio publikoak egiteko eta dirulaguntzak emateko epea etetea; antolakuntzatik kanpoko pertsonei bulegoak ixtea; Ihobek antolatutako ekitaldi, jardunaldi eta tailer guztiak bertan behera uztea; eta Ekoetxea sareko ingurumen-zentroak aldi baterako ixtea.

Ihobek bertan behera utzi ditu ekitaldi, hitzaldi, tailer eta antzeko ekitaldi guztiak, eta Ekoetxea ingurumen-zentroen sareko instalazioak ere aldi baterako itxi dituzte. Zentro horiek kudeatzen dituzten enpresetako langileek telelanaren bidez egingo dituzte beren zereginak.

Azkenik, Ihobek bere langileen bidaia guztiak bertan behera uzteko eta kanpoko bilerak ezinbesteko kasuetara mugatzeko gidalerroa onartu du (Zaldibarko zabortegiko zereginetatik eratorritakoak kasu).

Alarma-egoerak irauten duen bitartean egongo da indarrean kontingentzia-plana, eta Eusko Jaurlaritzak datozen egunetan egiten dituen aldaketetara egokituko da.