Klima Aldaketari eta Trantsizio Energetikoari buruzko Legearen arabera, 50.000 biztanletik gorako udalerrietan eta airearen kalitateari buruzko araudian araututako kutsatzaileen muga-balioak gainditzen dituzten 20.000 biztanletik gorako udalerrietan emisio txikiko eremuak ezarri behar dira. Euskal Autonomia Erkidegoan, 50.000 biztanletik gorako sei udalerrik ezarri behar dute: Gasteizek, Irunek, Donostiak, Bilbok, Barakaldok eta Getxok.

Udalerri horietan eremuak diseinatu eta ezartzeko prozesua errazte aldera, Ihobek, Eusko Jaurlaritzaren Ingurumen Jarduketarako Sozietate Publikoak, 2030 Udalsarearen (Udalerri Jasangarrien Euskal Sarea) Idazkaritza Teknikoa den aldetik, lantalde bat sortu zuen 2023an, emisio gutxiko eremu bat ezartzera behartuta dauden sei udalerrietako udalen ordezkariek osatua, plana egiten laguntzeko, eta esperientziak partekatzeko eta zailtasunak batera konpontzeko plataforma gisa erabiltzeko. Lantalde honetan parte hartu duten udalerrien esperientziak biltzen ditu txosten honek, etorkizunean emisio txikiko eremu bat ezarri nahi duten udalerrientzat eta ezarpen-prozesuan daudenentzat orientabide gisa balio dezaten.