Formatu hibridoan egindako jardunaldi honetan –presentziala CEOEren Madrilgo egoitzan-, goi mailako hainbat hizlarik taxonomiaren etorkizuneko inplikazioak eztabaidatu dituzte, bankuen, industriaren, ingurumenaren eta erregulazioaren ikuspuntutik.

Europar taxonomia klima-aldaketa arintzera eta berari egokitzera zuzenduta dago, baita horien etorkizuneko arau-garapenera ere. Taxonomia hau Europar Kontseiluak onartu zuen, 2020ko ekainean, karbono-neutraltasunera zuzendutako trantsizioa bultzatzeko xedez, zeren esparru bateratu eta bakar bat ezarri baitzuen ingurumen-jasangarritasuna zer den definitzeko, inbertsio berdeak sustatzeko xedez.

Europar erregelamendu honek sailkapen berri bat proposatzen du Europar Batasunaren ingurumen-helburuak lortzen laguntzen duten jarduera ekonomikoetarako, eta horrek ahalbidetuko die inbertitzaileei jakitea ea jarduera jakin batek ingurumen-irizpideak betetzen ote dituen, Europako Itun Berdearekin eta Parisko Akordioaren eta NBEren Garapen Jasangarriaren Helburuen babespean hartutako konpromisoekin bat etorriz.

Ihobe – Eusko Jaurlaritzako Ingurumen Jarduketarako Sozietate Publikoak aurkeztu ditu, bere Ekonomia Zirkularraren arloko zuzendari José María Fernández Alcaláren bitartez, europar taxonomiaren printzipioak euskal enpresetan modu egokian aplikatzeko garatzen ari diren lan-ildoak, bai enpresa handietan eta bai horien hornidura-katea osatzen duten ETEetan. Lan hori Basque Ecodesign Centerren bidez abiatu da, hots, Eusko Jaurlaritzaren eta Euskadiko enpresa nagusietako 14ren arteko lankidetzarako ekimen publiko-pribatuaren bidez.

Ihobez gain, mahai-inguruan honako hauek ere aritu dira: Cristina Rivero, CEOEko Industria, Energia, Ingurumen eta Klima arloaren zuzendaria; Gregorio Gonzalo, NWorldeko bazkidea; Ricardo Laiseca, BBVAko gerentzia-zuzendaria; Roberto Fernández, Iberdrolako EGE eta Ospe saileko zuzendaria; Susana Molinuevo, CIE Automotiveko Betetze eta ASGaren arloko zuzendaria; Luis López-Cózar, Azentúako gerentzia-zuzendaria; eta, jardunaldiaren moderatzaile gisa, Tomás Conde, NWorldeko ESG & Sustainable Finance arlokoa.