Klima Aldaketaren Pirinioetako Behatokiak (KAPB) -klima-aldaketaren arloan lurralde-lankidetzan aritzera zuzendutako mugaz gaindiko ekimen bat- eta LIFE SIP Pyrenees4Clima europar proiektuaren bazkide diren erakundeek Pirinioetako Klima-arriskuei buruzko lehenengo monografikoa prestatu dute, sute-arriskuak jorratzera zuzendua. Dokumentuak 16 gomendio biltzen ditu, klima-aldaketaren ondorioen prebentzioa aktibatzeko eta haien aurrean prest egoteko xedez, batez ere Pirinioetako suteei eta fenomeno natural kaltegarriei begira.

Txostenak prebentzioa eta prestakuntza aktibatu nahi ditu, intentsitate handiko baso-suteen eremu horretan gero eta handiagoa den arrisku baten aurrean

Txostenak deialdi bateratu bat egiten die Pirinioen inguruneko administrazio publiko guztiei, hedabideei eta herritarrei, ekintza azkartu egin dezaten klima-aldaketari eta aldaketa globalari lotuta dauden eta mendi-aldaketak mehatxatzen dituzten arrisku gero eta handiagoen aurrean.

Klima Aldaketaren Pirinioetako Behatokiak ohartarazten duenez, Pirinioek aurrez aurre dute intentsitate handiko baso-suteen arriskua, tenperaturen igoeragatik eta lehorte zein bero-boladen maiztasun handiagoagatik, eta baita lurzoruaren erabileretan gertatutako aldaketengatik ere, zeren horrek areagotu egin baititu erregaiaren metaketa eta baso-masen jarraitutasuna. Egoera horren aurrean, irizpenak azpimarratzen du beharrezkoa dela prebentzioa lehenestea, itzaltze-lanak lehenestearen ordez, paisaiaren kalteberatsuna murriztu eta sute handiak sorrarazten dituzten baldintzak mugatzen dituen lurralde-kudeaketa baten alde eginez.

Eusko Jaurlaritzak Pirinioetako lan-komunitatean parte hartzen du, Katalunia, Aragoi, Nafarroa, Akitania Berria eta Okzitaniarekin batera. Azken horrek Klima Aldaketaren Pirinioetako Behatokia bultzatzen du

Bere gomendio nagusien artean, KAPBek honako ekimen hauen garrantzia azpimarratzen du: paisaiaren kudeaketa mosaiko moduan bultzatzea, abeltzaintza intentsiboaren rola indartzea, eta klima-aldaketara egokitutako baso-kudeaketa jasangarria sustatzea, dibertsitate eta erresilientzia handiagoko basoetan oinarrituta. Dokumentua nabarmentzen du nekazaritza, basogintza eta artzaintzaren erabilera tradizionala berreskuratzearen balioa eta mendiko lurraldeetako zerbitzu ekosistemikoak aitortzeko beharra; halaber, administrazioen, ekoizpen-sektoreen eta herritarren arteko lankidetzarako deia egiten du, klima-aldaketak Pirinioetan planteatzen dituen arrisku gero eta handiagoei modu koordinatuan aurre egiteko.

Pyrenees4Clima Proiektua

Pyrenees4Clima proiektua garatzen da Pirinioetako komunitate zientifikotik, eskualde-administraziotik, lurralde-kudeatzaileen eta  herritarren elkartetatik. Ekimen honen helburu nagusietako bat da erantzun eraginkorrak ematea klima-aldaketatik ondorioztatzen diren arrisku-egoerei, zeren zuzeneko inpaktua baitute ekosistema naturaletan eta gizarteetan. Bero-boladen edo uholdeen moduko arriskuak gero eta maizago agertzen dira, eta zuzeneko ondorioak izaten dituzte pertsonen bizitzan eta ekosistemen osasun globalean.

Gomendio horiek LIFE SIP Pyrenees4Clima Europako proiektuaren esparruan garatu dira

Klima Aldaketaren Pirinioetako Estrategia (EPiCC) da Pirinioetako lurraldearen erresilientzia handitzeko esparru komuna, honako eragile hauek onartua: Espainiako Pirinioen inguruneko lau Autonomia Erkidegoek (Katalunia, Aragoi, Nafarroa eta Euskadi), bi frantziar eskualdek (Nouvelle Aquitaine eta Occitanie) eta Andorrako Printzerriak. Estrategiak aitortzen du klima-aldaketa arintzeko eta berari egokitzeko ekintzek Pirinioetan bultzatu eta sortzen dituzten adibide inspiratzaileak transferitzeko eta erreplikatzeko beharra.

Pyrenees4Clima proiektua osatzen duten erakundeek funtsezko informazioak azaltzen dituzte oraingo eta etorkizuneko egoerari buruz; halaber, praktika inspiratzaileak abiatzen dituzte, hala nola lehortetarako eta muturreko bero-boladetarako klima-zerbitzuen plataforma bat sortzea: plataforma horrek informazio erabilgarria emango luke denbora errealean, eta irisgarria izango litzateke gizarte osoarentzat; beste gomendio batzuen xedea da Prebentzioa eta Prestatze-lana aktibatzea Pirinioetako mega-suteen eta gertaera natural kaltegarrien aurrean, hala nola paisaiaren mosaiko moduko egitura lehenestea eta baso mistoaren alde egitea, hau da, ekosistema edo habitat mota desberdinak biltzen dituzten eremuak lehenestea, intentsitate handiko suteak saihesteko xedez 

Pirinioetako klima-egoerak arreta handia piztu du hedabideen artean. Nolanahi ere, inplikatutako erakundeek espero dute eragin handiagoa izatea politika publikoetan, klima-aldaketaren erreferenteak izateko xedez, eta, horren bidez, ezinbesteko eragileak izateko lurraldeetan, klima-aldaketaren aurreko lanari heltzen zaionean.