Euskal Kazetarien Elkarte eta Elkargoak antolatutako Euskal Kazetaritza Sariak emateko ekitaldian parte hartu du Amaia Barredo Ingurumen sailburuordeak, eta Ingurumen Kazetaritza Saria eman dio Gorka Belamendiari. Salburuako Hezeguneen Interpretazio Zentroko arduraduna da Gorka Belamendia, eta maiz parte hartzen du komunikabideetan.

Hegaztiekin, espazio naturalekin eta ingurunearekin zerikusia duten gaietan egindako dibulgazio-lana aitortu nahi izan du euskal komunikabideetako ordezkariz osatutako epaimahaiak. Izan ere horixe baita Ingurumen Kazetaritza Sari honen helburua: ingurumenaren arloan espezializatutako profesionalen jarduera saritzea, funtsezko egitekoa baitute euskal gizartean ingurumena errespetatzeko balioak eta jasangarritasunaren kultura sustatzeko zereginean.

Bere mintzaldian, kazetariek informazio zehatza eta testuinguruan kokatua eskaintzeko duten zeregin garrantzitsua azpimarratu du Amaia Barredo sailburuordeak. “Gizarteak, ekonomiak eta, jakina, ingurumenak aurren dituzten erronka handien arteko loturak ulertzeko, inoiz baino beharrezkoagoa da ekitera bultzatuko gaituen informazio egokia”.

Era berean, Covid-19aren pandemiaren eraginez mundu osoa jasaten ari den krisi larria ere aipatu du Barredok, eta azpimarratu du “klima-aldaketaren moduko arazoak, nahitaezko energia-trantsizioa edo ekonomia zirkularreranzko eredu-aldaketa hemen ziren koronabirusa etorri baino lehenago ere, eta ezinbesteko egiten digu erne egotea, gure politikak mantentzea eta are sendotzea eta, zenbaitetan, prozesuak bizkortzea, hobeto prestatuak egon gaitezen”-

Euskal Kazetaritza Sarien 2021eko edizioan saritutako profesionalak izan dira: euskal osasun-langileen kolektiboa, Gizarte Erakundearen kategorian; Mikel López Iturriaga, “El Comidista”, Komunikazio Digitalaren kategorian; José Manuel Alonso, Ibilbide Profesionalaren kategorian; Rosa María Calaf, Adierazpen Askatasunaren kategorian; Luis Calabor, Fotokazetaritza kategorian, eta Zigor Aldama, Euskal Kazetariaren kategorian; haiekin batera, lehen aipaturiko Gorka Belamendia, Ingurumen Kazetaritza kategorian.

Sari horiek Ihoberen, Eusko Jaurlaritzako Ekonomiaren Garapen, Iraunkortasun eta Ingurumen Saileko Ingurumena Kudeatzeko Sozietate Publikoaren, laguntza dute.