• Euskadiko Klimaren eta Energiaren Asteak zortzigarren edizioa egingo du urriaren 16tik 25era, “Zure arrastoa keinu bakoitzean hasten da” lelopean, eguneroko ohitura txikiak eraldatzeko deia eginez 
• Udalek, ikastetxeek, enpresek eta gizarte erakundeek dagoeneko sar ditzakete beren ekintzak Euskadi osora hedatuko den programazioan
• KLIMA Azoka ibiltariak zeregin nabarmena izango du edizio honetan, 2026ko lehen seihilekoan 2.000 pertsona ingururi sentsibilizatzeko jarduerak hurbildu ondoren

Urriaren 16tik 25era ASTEKLIMAren zortzigarren edizioa egingo da, Euskadiko Klimaren eta Energiaren Astea, Industria, Trantsizio Energetiko eta Jasangarritasun Sailak bultzatuta ekimena, Ihoberekin eta Energiaren Euskal Erakundearekin  (EVE) lankidetzan, aurten fokua eguneroko erabakiek kliman eta energian duten eraginean jarrita. «Zure arrastoa keinu bakoitzean hasten da» lelopean, 2026ko edizioak, besteak beste, mugikortasunari, kontsumoari, energiari edo elikadurari lotutako ohiturei buruz hausnartzera gonbidatzen gaitu, etorkizun jasangarriago eta erresilienteago baterako aldea markatu dezaketelako.

Duela zazpi urtetik, ASTEKLIMA klimari eta energiari buruz sentsibilizatzeko Euskadiko programa nagusien artean finkatu da. Ekimenak administrazio publikoak, ikastetxeak, unibertsitateak, enpresak, elkarteak eta gizarte erakundeak biltzen ditu udazkenero, helburu partekatu batekin: errealitate energetikoa eta ekintza klimatikoa herritarrengana hurbiltzea, esperientzia parte hartzaile, praktiko eta hurbilen bidez. 

2026ko edizioak filosofia hori indartu nahi du, arretagunea eguneroko keinu txikien ahalmen eraldatzailean jarrita. Joan-etorriak egiteko modutik etxean energia kontsumitzeko edo erosketa jakin batzuk egiteko modura, eguneroko erabaki ugarik eragina dute berotegi efektuko gasen emisioetan eta energia eredu jasangarriago baten eraikuntzan. ASTEKLIMAk hausnarketa hori ekintza bihurtzea proposatzen du, herritarrei zeregin horretan lagunduko duten tresnak, ezagutzak eta esperientziak hurbilduz.

ASTEKLIMAren indarra aurreko edizioan lortutako partaidetzan ere ikusten da. 2025ean, 87 erakunde antolatzaile bildu zituen, zeinek herritarrei irekitako 138 jarduera bultzatu zituzten lurralde osoan, eta ekimena Euskadiko klima eta energia arloko sentsibilizazio eta mobilizazio ekimen nagusien artean sendotu.

Deialdi irekia, Euskadiko agenda klimatikoa eraikitzeko

Erakundeak dagoeneko ireki du udal, ikastetxe, unibertsitate, enpresa, GKE eta beste erakunde batzuek ASTEKLIMA 2026ko programazioan jarduerak txertatzeko deialdia. 

Tailerrak, erakusketak, dibulgazio hitzaldiak, familia jarduerak, bisita gidatuak edo sentsibilizazio ekimen berritzaileak hiru lurralde historikoetan banatutako eta herritar guztiei irekitako programazio baten parte izan daitezke.

Jarduerak inskribatzeko, www.asteklima.eus webgune ofiziala erabil daiteke, eta aurtengo edizioari buruzko informazio guztia ere bertan dago eskuragarri.

ASTEKLIMA 2026k, gainera, herritarren sentsibilizazio eta mobilizaziorako ekimen eredugarriak bultzatzen dituzten erakundeen konpromisoa aitortuko du berriro. Ezarritako baldintzak betetzen dituzten jarduera guztiek aitortza jasoko dute Asteari egindako ekarpenagatik, eta, horien artean, epaimahai espezializatu batek ekintza klimatikoari eta trantsizio energetikoari lotutako hainbat kategoriatako ekimenik onenak hautatuko ditu.            

KLIMA Azoka izango da edizioko nobedade handienetako baten protagonista

ASTEKLIMAren zortzigarren edizioak, gainera, aliatu garrantzitsu bat izango du: KLIMA Azoka Ihobek eta EEEk bultzatutako azoka ibiltariak 2.000 parte hartzaile ingururekin itxi zuen 2026ko lehen seihilekoa, eta publikoak 5etik 4,68ko batez besteko balorazioa eman zuen. 

Dinamika parte hartzaileen, jokoen eta espazio interaktiboen bidez, KLIMA Azokak energiari, mugikortasunari, kontsumo ohiturei edo eguneroko ekintza klimatikoari buruz hausnartzera gonbidatzen du, banakako erabakiek ere etorkizun jasangarriagoa eraikitzen laguntzen dutela erakusteko. 

Zenbait ekitalditatik igaro ondoren –Ibilaldia, Ingurumenaren Munduko Eguna, Euskal Eskola Publikoaren Jaia edo Araba Euskaraz–, azokak udazkenean jarraituko du bere bidea egiten, eta presentzia nabarmena izango du ASTEKLIMA 2026ko programazioaren barruan. 

ASTEKLIMA 2026k, gainera, bat egingo du Euskalitek koordinatze duen Kudeaketa Aurreratuaren Europako Astearekin, erakunde berritzaile, jasangarri eta etorkizuneko erronkekin konprometituagoak sustatzen dituen ekimenarekin. Hori urriaren 14tik 28ra bitartean egitea aurreikusita dago, eta bi hitzorduek trantsizio jasangarriari lotutako balioak eta jarduera eremuak partekatzen dituzte, sinergiak indartzeko eta inpaktu soziala zabaltzeko aukerak sortzeko.

Trantsizio energetikoari eta klima aldaketari heltzeko, eraldaketa handiak behar dira, baina baita eguneroko milaka erabaki txiki ere. Planteamendu horrekin, Euskadiko Klimaren eta Energiaren Asteak aurrera egiten jarraitu nahi du, herritar informatuak, erantzukideak eta prozesu horrekin konprometituak eraikitzeko. Ekintza kolektiboak lehen urrats indibidual batetik hasten direlako beti, eta, edizio honetako leloak gogorarazten duen bezala, «Zure arrastoa keinu bakoitzean hasten delako».