Ihobe – Eusko Jaurlaritzaren Ingurumen Kudeaketarako Sozietate Publikoak – saio berri bat antolatu du, industria‑ eta ingurumen‑arloan Europan ireki den ziklo politiko berria aztertzeko. Ziklo hori Industria Itun Garbiak (Clean Industrial Deal) markatzen du, eta haren aplikazio praktikoa Euskadiko enpresen lehiakortasunerako funtsezkoak diren ekonomia zirkularreko 10 gakoko estrategiatan islatzen da.

Jardunaldi horren esparruan, Ihobek "Ekonomia zirkularreko Ingurumen-zaintza Estrategikoko 2026ko Txostena" aurkeztuko du, ekonomia zirkularra datozen urteetan markatuko duten 10 gakoak identifikatzen dituen azterketa estrategikoa

Europako politikak industria‑lehiakortasuna, autonomia estrategikoa eta deskarbonizazioa indartzera bideratzen ari diren testuinguruan, Ekosteguna honek aurrea hartzeko eta aplikazio praktikora bideratutako irakurketa eskainiko du, epe labur eta ertainean industriaren posizionamendu lehiakorra berrantolatzen ari diren arau‑aldaketei, merkatu‑joerei eta Europako tresna berriei buruz.

“Ekonomia zirkularreko Ingurumen-zaintza Estrategikoko 2026ko Txostena" Ekosteguna-Ekonomia Zirkularraren ostegunak jardunaldian aurkeztuko da apirilaren 16an

Saioak aurkezpen sintetikoak, adibide praktikoak eta elkarrizketarako gune bat uztartuko ditu, enpresei ikuspegi argi eta ekintzara bideratua eskaintzeko, arriskuei aurrea hartzeko, aukerak identifikatzeko eta erabaki estrategikoak bideratzeko.

Jardunaldian, besteak beste, honako gai hauek landuko dira:

• Gardentasunari, txostengintzari eta enpresen posizionamenduari lotutako aldaketa nagusiak, CSRD, CSDDD, ESRS estandarrak eta ETEentzako borondatezko VSME txostengintza barne.
• Ekodiseinuaren aurrerapena lehiakortasun‑palanka gisa, ESPR Erregelamenduaren eskakizun berriekin eta produktuaren pasaporte digitalaren ezarpenarekin batera.
• Lehengaien eta hondakinen kudeaketaren dinamika berriak, Ekonomia Zirkularrari buruzko etorkizuneko Europako Erregelamendutik hasi eta ehungintzan, EEHn (RAEE), elikagai‑hondakinetan eta ontzietan aurreikusitako arau‑aldaketetaraino.
• Industria‑lehiakortasuna bultzatzeko Europako tresnen ikuspegi integratua, hala nola Industrial Accelerator Act, CBAM eta Net Zero Industry Act, bai eta finantza jasangarriek eta fiskalitate berdeak irekitzen dituzten aukera berriak ere.

Jardunaldian, halaber, Basque Ecodesign Center‑en esparruan egindako 2026ko Ekonomia Zirkularrari buruzko Ingurumen Zaintza Estrategikoko Txostenaren ondorio nagusiak aurkeztuko dira. Ondorio horiek euskal enpresa‑ehunaren lehiakortasuna baldintzatuko duten faktore estrategikoak sintetizatzen dituzte, eta enpresa‑erabakiak hartzeko erreferentzia‑esparru gisa balioko dute.

Hau da aurten ospatuko diren 16 Ekostegunen lehena

Jardunaldia bereziki honako hauei zuzenduta dago:

• Industria‑enpresei eta zerbitzu aurreratuetako enpresei, bereziki Europako araudiak baldintzatutako balio‑kateetan txertatuta daudenei.
• Eskakizun berriei aurrea hartu eta ingurumen‑ eta merkatu‑estandar berrietara lerrokatu behar duten ETEei.
• Jasangarritasun, ekodiseinu, berrikuntza, arau‑betetze eta enpresa‑estrategiako arduradunei.
• Sektore publikoari, enpresa‑laguntzako erakundeei, klusterrei eta lehiakortasun‑eragileei.
• Industriaren deskarbonizazio eta zirkulartasun prozesuetan laguntzen duten aholkularitzei eta talde teknikoei.

Ekitaldia online izango da, doakoa, aldez aurretik izena emanda.

16 hitzordu Ekosteguna- Ekonomia Zirkularraren ostegunekin 2026an

Ekosteguna- Ekonomia Zirkularraren ostegunak Ihobek, Eusko Jaurlaritzaren Ingurumen Jarduketarako Sozietate Publikoak, bultzatutako jardunaldi teknikoen ekimena da, euskal enpresa-sareari zuzendua, ekonomia zirkularrago, deskarbonizatuago eta lehiakorrago baterako trantsizioan laguntzeko. Ziklo honek jardunean dauden profesionalei zuzendutako azterketa eta hausnarketa praktikorako guneak eskaintzen ditu, Euskadiko enpresen lehiakortasuna baldintzatzen ari diren erregulazio-aldaketak, merkatu-joerak eta tresna berriak aurreratzeko, bereziki ekonomia zirkularra, baliabideen eraginkortasuna edo jasangarritasun industriala bezalako esparruetan.

Apirilaren 16ko Ekostegunak 2026 programaren hasiera markatzen du, eta urtean zehar garatuko da gaikako saioen egutegi oso baten bidez. Zikloak Euskadiko industriaren eta zerbitzu aurreratuen eraldaketa-bektore nagusiei ekingo die pixkanaka, enpresei ekonomia zirkularrari eta jasangarritasunari lotutako erronken eta aukeren ikuspegi praktiko eta aurreratua eskainiz. Ekosteguna-Ekonomia Zirkularraren ostegunak 2026 programaren egutegi osoa, aurreikusitako data eta eduki guztiekin, Ihoberen webgunean dago eskuragarri.