Lerro berria ETE Zirkularra 2021 ekimenaren barruan kokatzen da. Ekimen horrek ekonomia zirkularra enpresa txiki eta ertainetan integratzea sustatzen du, Jaurlaritzak Euskadiko industria-sarearen eskura jartzen dituen tresna desberdinak osatuz euskal ETEen balio lehiakor jasangarria hobetzeko.

Programa ETE Zirkularra ekimenaren barruan dago, ekonomia zirkularra enpresa txiki eta ertainetan integratzea sustatzen duena

Ekonomia zirkularra enpresa txiki eta ertainetan sartzea bizkortzeko, baliabideen kostu/eraginkortasunaren eta enpresa-ehunaren iragazkortasun optimoarekin, Eusko Jaurlaritzaren Dirulaguntzen Plan Estrategikoan jasotako laguntza-programa honek ingurumen-erronkei erantzuna ematen dieten proiektuen –merkatukoei nahiz etorkizuneko erregulazioei lotutakoei– garapena finantzatuko du, aitortutako tresnak eta metodologiak aplikatuz. Oinarriak argitaratuta daude, eta laster irekiko da eskaerak aurkezteko epea. Diruz lagundutako proiektuak 2022an garatu beharko dira.

Deialdia, nagusiki, Europako Ekonomia Zirkularraren Ekintza Planean, Euskadiko Ekonomia Zirkularrerako Estrategia 2030en eta berriki onetsitako 2024ko Ekonomia Zirkularraren eta Bioekonomiaren Planean identifikatutako sektoreetako balio-kateei zuzendua dago. Lan-modalitatea taldekakoa izango da, proiektu bakoitzeko gutxienez 5 ETEren parte-hartzearekin, ikaskuntza eta enpresen arteko lankidetzak konbinatuz, enpresa parte-hartzaileen arteko sinergiak sortuz eta banakako lanarekiko balio bereizgarria emanez. Proiektuen buru tarteko eragileak izango dira, hala nola klusterrak edo garapen-agentziak, proposamenak aurkezteko eta proiektuak koordinatzeko ardura izango dutenak.

Laguntza-lerroaren aurrekontu-zuzkidura 1 milioi eurokoa izango da

ETE Zirkularra ekimenaren barruko Eusko Jaurlaritzaren laguntza-programa berri honek (1.000.000 €-ko zuzkidura) justifika daitezkeen gastuen % 100 finantzatuko du –gehienez ere 100.000 €-ko mugaraino proiektu bakoitzeko–, muga hauekin:

1. Proiektuaren sustapen-, kudeaketa- eta gainbegiratze-jarduerak tarteko eragileen ardura izango dira, eta gehienez ere 15.000 € finantzatuko dira proiektu bakoitzeko.
2. Laguntza tekniko espezializatuaren kontratazioak gehienez 15.000 €-ko zenbateko finantzagarria izango du parte hartzen duen ETE bakoitzeko.
3. Hirugarren alderdi independente batek egiaztapenak kontratatzeko gehieneko zenbatekoa 2.000 €-koa izango da enpresa bakoitzeko.

Oinarri arautzaileak Ihoberen webgunean argitaratuta daude, eta datozen egunetan irekiko da eskaerak aurkezteko epea. Erakunde interesdunek laguntza horiekin lotutako izapide guztiakEusko Jaurlaritzaren Egoitza Elektronikoaren bidez eskatu, kontsultatu eta egin ahal izango dituzte.

Programan parte hartzeko, honako tipologia hauetakoren bati egokitu ahal izango zaizkio proiektuak:

• Aukera zirkularrak identifikatzea merkatua zainduz, ekonomia zirkularreko diagnostikoaren bidez, edo gogoetaren eta ekintza-plan baten bidez erronka berrien aurrean.
• Bizi-zikloaren ikuspegia eta merkatuan bereiztea produktuaren, erakundearen edo zerbitzuaren ingurumen-inpaktuak zehazteko eta ingurumen-aztarnak, ekoetiketak, etab. bezalako aitorpenak lortzeko.
• Ingurumen-hobekuntza eta erregulazio zirkularrei aurrea hartzea produktuetan eta zerbitzuetan ingurumen-hobekuntzak ezarriz; Europako Batzordearen Zirkulartasunaren 45552-9 Mandatutik eratorritako arauak eta estandarrak aplikatzea, ErP Ekodiseinuaren Zuzentarauaren esparruan; produktuen edo osagaien (produktu plastikoen eta eraikuntzako materialen) birziklatze-materiala baliatzearen bideragarritasun teknikoa, ingurumenekoa eta ekonomikoa erakustea; edo bilgarrien eta enbalajeen ekodiseinua.
• Markaren balio-katearen jasangarritasuna eta ospea erakunde bezero handien eskakizun berdeei erantzuteko.
• Estrategia zirkular berriak sortzea, produktuen, materialen eta osagaien bizitza baliagarria zabaltzearekin zerikusia dutenak (berrerabiltzea, birziklatzea eta berreskuratzea, konpontzea, berregokitzea, birmanufakturatzea); serbitizazioarekin (zerbitzutik produktura eraldatzea); industria-sinbiosia; produktu eta zerbitzuen alokairuan eta erabilera partekatuan oinarritutako eredu berriak sortzearekin; edo elektronika, garraio eta mugikortasun jasangarriarekin.

Euskal ETEetan ekonomia zirkularra bultzatzeko laguntza-programa berri hau Eusko Jaurlaritzako Ekonomiaren Garapen, Jasangarritasun eta Ingurumen Sailak sustatzen du, Ihobe Ingurumen Jarduketarako bere Sozietate Publikoaren bidez.

Oinarri arautzaileak