Euskal Herriko Unibertsitateko (UPV/EHU) Udako Ikastaroen eta Donostia Sustainability Forum-en barruan, Eskolak, Ihobe Eusko Jaurlaritzako Ingurumen Jarduketarako Sozietate Publikoak eta Ingurumen Informaziorako Kazetarien Elkarteak (APIA) antolatuta, irailaren 12an izango da seigarren edizioa, Miramar Jauregian. Hainbat ikuspegitik ingurumen arazoak gehiago eta hobeto komunikatzeko kontakizuna aldatzen ari diren eta energia eta klima trantsizioan aurrera egiten laguntzen ari direnen arteko elkarrizketa sakonetarako saioa bilakatu da.

Hizlarien artean, Fernando Valladares (CSIC), Asuncion Ruiz Guijosa (SEO-Birdlife-ko zuzendari exekutiboa), Naiara Goia (Arantzazu Lab-eko zuzendaria) eta Adela Ucar, Rafael Ruiz Peña, Yayo Herrero eta Javier Peña komunikatzaileak daude, besteak beste

Hausnarketarako gune bat sortzeko eta ingurumen-erronka handien komunikazioari buruzko gako batzuk eskaintzeko helburuarekin, Ingurumen Komunikazioko Eskolak hainbat diziplinatako profesional garrantzitsuak bilduko ditu aurten. Elkarrizketa inspiratzailez betetako programa prestatu du horretarako, baterako sorkuntzako tailer batean eta Santa Klara uhartera eta Hondaleara bisita batean, formatu presentzialean parte hartzen duten pertsonei zuzendutakoa. Hala, hizlariek hainbat gai jorratuko dituzte: krisi klimatikoa, bioaniztasunaren galera, ingurune naturalaren kontserbazioa, ekonomia zirkularraren ezarpena eta garapen iraunkorra, besteak beste.

Aurtengo edizioari balioa eransten dioten izarren artean, Fernando Valladares, CSICeko ikerketa irakaslea eta Rey Juan Carlos Unibertsitateko irakasle elkartua, nabarmentzen dira. Valladaresek, asko aipatzen den zientzialariak, ikerketa ugari egin ditu biodibertsitateak eta klima-aldaketak eta giza jarduerak ekosistemetan duten eraginari buruz. Ingurumen-krisiak eragindako kezkak bultzatuta, hainbat hedabidetan eta sare sozialetan duen La Salud de la Humanidad kanalean aktibo dihardu dibulgazio-lanetan.

Zientziaren alorrean ere, Asunción Ruiz Guijosa SEO/BirdLife erakundeko zuzendari exekutiboa hurbilduko du Eskolak. Espainiako natura eta biodibertsitatea aztertzeaz eta kontserbatzeaz arduratzen den erakundea da SEO/BirdLife. Espainiako espazioen ingurumen-egoeran aditua da (Red Natura 2000, adibidez), eta hainbat argitalpen eta monografia egin edo editatu ditu, proiektu handiak diseinatzeaz, ezartzeaz eta zuzentzeaz gain.

Halaber, Javier Peña Sánchez dibulgatzaile zientifikoak parte hartuko du, Hope! sare sozialetako komunikazio proiektuaren sortzaileak. Klima eta ekologia krisiari aurre egiteko konponbideei buruzko bere bideoek 900 milioi erreprodukzio baino gehiago izan dituzte, eta bere kanal sozialek 2 milioi eta erdi jarraitzaile dituzte.

Eskolan ohikoa denez, hizlarien taldean ingurumen-arloko lehen mailako kazetariak daude. Besteak beste, Adela Ucar Innerarity, gizarte, osasun, emakume eta ingurumen gaietan espezializatutako kazetaria eta telebista aurkezlea. Lau urte daramatza TVEko La2 katean Reduce tu huella (‘Murriztu zure aztarna’) ingurumen kontzientziazio programaren buru, eta Cuatro-n 21 Días programa ere aurkeztu du, besteak beste.

Aurten, Rafael Ruiz Peña ere izango da, 1992tik ingurumenean espezializatutako kazetaria eta APIA elkartearen sortzaileetako bat. 25 urtez El Pais eta El País Semanal saioetan erredaktore lanetan aritu ondoren, 2013tik, El Asombrario kultura eta ingurumen aldizkari digitaleko koordinatzailea da, Público egunkariko bazkidea.

Yayo Herrero López ekologia politikoko, ekofeminismoetako eta bizitzaren iraunkortasunerako hezkuntzako aholkularia, ikertzailea eta irakaslea da. Gizarte eta Politika Zientzietan doktorea, gizarte eta kultura antropologoa, gizarte hezitzailea eta nekazaritza ingeniari teknikoa, Garua Kooperatiba Elkarteko bazkide langilea da eta mugimendu ekologistan parte hartzen du.

Stéphane Kosinski ere, erraztaile profesionala da, erakundeei eredu jasangarriagoetarako trantsizioan laguntzen zentratua. Kosinski Adesio kooperatibaren eta errazte-agentziaren sortzaileetako bat da, eta mota guztietako erakundeei laguntzen die. Horrez gain, Klimaren muralaren koordinatzailea eta Triple Balance Sannas enpresen elkartearen artikulatzailea da Euskadin.

Tokiko profesionalek ere osatzen dute programa: Mari Mar Alonso Martín, Ihobeko Ekintza Klimatikoko zuzendariak; Naiara Goia Imaz, Arantzazulab berrikuntza sozialeko laborategiko zuzendari nagusiak; eta Mari Luz Gómez, Ihobeko Ingurumen Jasangarritasunaren alorreko herritartasun-proiektuaren arduradunak. Gainera, Maria García de la Fuente eta Luis Guijarro García ere daude programan, ingurumen-kazetariak izateaz gain, APIAko presidentea eta zuzendaritza batzordeko idazkari nagusia direnak.

Klima aldaketak ez du graziarik II erakusketa

2024ko Ingurumen Komunikazioko Eskolak, gainera, Ballena Blanca aldizkariak ekoiztutako El cambio climático no tiene gracia II (Klima aldaketak ez du graziarik II) erakusketa ekarriko du. Uztailaren 15etik irailaren 13ra bitartean, erakusketak klima aldaketaren ikuspegi umoretsua erakutsiko du Miramar Jauregian.


“Gizakiok inoiz bizi ez dugun egoera bati aurre egin behar diogu, erantzun irmoa eta atzerapenik gabekoa eskatzen duena. Datuak eta ondorioak ezagutzen ditugu. Hala ere, oraindik ez dira iritsi erreakzioak. Erakusketa honetan, satira erabiltzen dugu funtsezko gai baten inguruan lo dauden gogoak astintzeko lengoaia gisa”, azaldu dute Ballena Blancatik.

2015ean Parisko Klimaren Goi Bileran abiatu zen aldizkariaren proiektu baten bigarren edizioa da erakusketa. Mundu osoko bineta-egileen lanak biltzen ditu, planetako hainbat puntutik arazoa nola ikusten zuten irudikatu zutenak. Erakusketak, orain, gizarte osoari eragiten dion arazo baten tokiko efektuei “punta ateratzea” bilatzen du: “Klima aldaketak gero eta grazia gutxiago egiten du”.

Eskola unibertsitateko ikasleei zein unibertsitatez kanpokoei, irakasleei, hainbat sektoretako profesionalei eta, oro har, publikoari zuzenduta dago. Izen-emateak zabalik daude Euskal Herriko Unibertsitateko (EHU) Udako Ikastaroen orrian, eta bertan kontsulta daiteke programari buruzko informazio guztia.