2023ko Mugikortasunaren Europako Astearen helburua, mugikortasun jasangarriari buruz kontzientziatzeko eta mugikortasun aktiboaren aldeko portaera-aldaketa sustatzeko euren esperientzia, sormena eta dedikazioa eskaintzen duten pertsonen eta tokien arteko sinergiak sustatzea da. Europako Batzordeak 2023ko kanpainarako aukeratu duen gaia “Energia eraginkortasuna “ da, eta urte honetarako eta hurrengo urteetarako leloa “Konbinatu eta mugitu!” izango da.

Ihobek, Udalsarea 2030en idazkaritza teknikoa den aldetik, hamarkada bat baino gehiago darama Euskadirako Mugikortasunaren Europako Astearen koordinatzaile autonomikoa izaten. Zeregin hori betez, aldizka kanpainaren aurrerapenen berri ematen du albisteen bitartez, horri buruzko kontsultei erantzuten die eta, gainera, laster erabilgarri egongo den eta kanpainaren baliabide grafikoak euskaraz eta gaztelaniaz doan deskargatu ahal izango diren gune espezifikoa du bere webgunean, web berrian toki-erakundeek kanpainan zehar erabili beharreko materialak sortzeko.

SEM izenez ezagutzen den Mugikortasunaren Europako Astea, Europako Batzordeak hiri-mugikortasun jasangarriari buruz egiten duen sentsibilizazio-kanpaina nagusia da.

Mugikortasun aktiboaren, garraio publikoaren eta bestelako garraio-soluzio garbi eta adimendunen aldeko portaera-aldaketa sustatzen du. Ekimenaren bost ardatzak pertsonak, tokiak, garraio publikoa, plangintza eta politika publikoak dira.

Urtero irailaren 16tik 22ra egiten da, eta Autorik Gabeko Egun ezagunarekin amaitzen da. Astean plangintza-neurri berritzaileak probatzeko, azpiegitura eta teknologia berriak sustatzeko, airearen kalitatea neurtzeko eta herritarrak sentsibilizatzeko erabiltzera animatu nahi dira toki agintariak.

2023ko Mugikortasunaren Europako Astean udal gisa parte hartzeko hiru irizpideetako bat bete behar da gutxienez:

• Astean zehar (irailak 16-22) jarduerak antolatzea.
• Udalerrian gutxienez neurri jasangarri bat ezartzea 2023an.
• Autorik Gabeko Eguna ospatzea (ahal dela, irailaren 22an, ostirala).