Basque Circular Hubek eta Pyme Circular ekimenak, biak Ihobe sozietate publikoak kudeatuta, Jardunean dauden profesionalentzako ekonomia zirkularreko prestakuntza programaren 2025eko deialdia abiarazi dute, Gasteizko Udalaren, Bilboko Udalaren eta CONFEBASK eta bere kide diren ADEGI, CEBEK eta SEA elkarteen laguntzarekin. Programa Industria sektoreko enpresei zuzenduta dago, batez ere ETEei.

Edizio berrian funtsezko gaiak jorratuko dira, hala nola karbono aztarna, deskarbonizazio estrategiak eta arrisku klimatikoak, gardentasuna eta ingurumen posizionamendua, ekodiseinua ekonomia zirkular baterako, finantza jasangarriak, eta lehengaiak eta hondakinen kudeaketa.

Ikastaroek araudiei eta merkatuei buruzko azken nobedadeak ezagutzeko aukera eskaintzen diete enpresei, eta horrek arriskuak eta aukerak identifikatzen lagunduko die erabaki informatuak hartzeko eta beren posizionamendu lehiakorra hobetzeko. Prestakuntza amaitzean, parte hartzaile guztiek diploma bat jasoko dute parte hartu dutela egiaztatzeko.

Karbono aztarna eta deskarbonizazio estrategiak eta arrisku klimatikoak

Ikastaro hau 4 moduluk osatuta dago, eta bere helburua da erakundearen 1, 2 eta 3 irismenetako karbono aztarna kalkulatzen ikastea, eta bezeroen, administrazioen eta finantza sektorearen ingurumen informazioko eskakizunei erantzun ahal izatea. Gainera, ikastaroak produktuaren bizi zikloaren kontzeptua sartu nahi du enpresetan, eta, beraz, bertaratutakoek produktu sinple baten karbono aztarna kalkulatuko dute eta, ahalegin berarekin, produktuaren ingurumen profila izango dute, Ihoberen “Climate&Circularity Calculator” tresna erabiliz. Era berean, beren enpresaren arrisku klimatiko fisikoak eta trantsiziokoak ebaluatzen ikasiko dute eta karbonoaren muga doikuntzarako mekanismoaren inguruko baldintzak eta berrikuntzak ezagutuko dituzte.  

ESG: Gardentasuna eta ingurumen posizionamendua

ESG Reportingaren esparruko ikastaro honetan, ingurumen, gizarte eta gobernantza alderdiak neurtu, komunikatu eta kudeatzeko gida gisa balio duten estandarrak eta erreferentziazko esparruak aurkeztuko dira. Gainera, EBko Omnibus lege sortak Jasangarritasunari buruzko informazio korporatiboaren Zuzentarauan eta ESRS Erregelamenduan sartzen dituen aldaketen ondorioak jorratuko dira eta VSMEan, ETEetarako borondatezko estandarrean, sakonduko da.

Ekodiseinua, ekonomia zirkular baterako

Ikastaro hau zortzi moduluk osatuta dago, eta bere helburua da enpresak trebatzea produktu eta zerbitzuen garapenen ekodiseinua eta zirkulartasuna integratzen jakin dezaten. Honako gai hauek jorratuko dira bertan: Europako araudi berria, konpongarritasun, iraunkortasun eta birziklagarritasunerako baldintzak, zirkulartasuna ebaluatzeko UNE eta ISO arauetan oinarritutako metodologiak, produktuaren pasaporte digitala hedatzea, zerbitizazioa eta birmanufaktura eredu zirkular gisa, ontzien ekodiseinua eta eraikuntza produktuei aplikatu beharreko araudia, hainbat sektoreri ikuspegi eguneratu eta aplikatua eskainita. 

Finantza jasangarriak.

Modulu honen helburua da EBko Finantza Jasangarrien Taxonomiak enpresei ezartzen dizkien betebeharrak ulertzea, bai eta araudi honek finantzaketa jasangarria eskuratu, ESG posizionamendua hobetu edo CSRDk txostenak egiteko ezarritako baldintzak bete nahi dituzten erakundeengan dituen ondorioak ere.  Gainera, azken araudi eguneratzeak jorratuko dira, Omnibus lege sortak sartutakoak barne, eta kalte esanguratsurik ez eragiteko printzipioan (DNSH) sakonduko da, hori baita proiektu eta jarduera jasangarrien adostasuna ziurtatzeko funtsezko baldintza. 

Lehengaiak eta hondakinen kudeaketa

Ikastaro hau modulu bakar batek osatuta dago, eta eraikuntza produktuetarako esparru juridiko berrian eta eraikuntza eta eraispen hondakinen kudeaketatik sortzen diren aukeretan zentratuko da. Ikastaroak ingurumen administrazioaren legearen 84. artikulua jorratuko du eta eraikuntza sektorean jasangarritasuna inplementatu, ebaluatu eta ziurtatzeko gidak eta tresnak eskainiko ditu, material birziklagarrien eta sekundarioen erabilera sustatzeko.