Jardunaldiaren irekiera Amaia Barredoren esku egon da, Eusko Jaurlaritzako Ingurumen sailburuordearen esku. Legealdi berrirako jarritako helburuak aurkeztu ditu, eta toki-erakundeei zuzendutako laguntzei buruzko ikuspegi osoa eman du: berriki 2020ko deialdia ebatzi berri duen garapen jasangarria sustatzeko Eusko Jaurlaritzak toki-erakundeei emandako laguntzei buruzko Agindua; Udalsarea 2030en tokiko berrikuntzarako urteko programa; eta MITECOren (Trantsizio Ekologikorako eta Erronka Demografikorako Ministerioa) Ingurumena bultzatzeko programa (PIMA). Funts horiek guztiak Ihobek Euskadin bideratzen dituen udalerriei zuzendu zaizkie.

Bestalde, Ihobeko zuzendari nagusi Alexander Botok -Udalsarea 2030eko Idazkaritza Teknikoak- Ihoberen egitura berria aurkeztu du, eta legealdi honetarako plan estrategiko berria. Gainera, abiarazi du Sarearen jarduketa- eta lankidetza-esparru estrategikoari buruzko hausnarketa; izan ere, kideek parte hartu duten prozesu baten ondoren, prozesu horrek datozen lau urteetarako Plan Estrategikoa 2030en prestaketa eta hitzarmenaren berritzea ekarriko du (aurreko urteko abendura arteko indarraldia baitzuen).

Alexander Botok nabarmendu du berritze-prozesu hori, Basque Country 2030 Agendaren barruan, Nazio Batuen Batzar Nagusiak 2015ean onetsitako Garapen Jasangarriaren Helburuekin (GJH) lerrokatuko dela une oro, eta parte hartzen duten alderdi guztien lankidetza eskatu du hori lortzeko.

Sarea dinamizatu, koordinatu eta sustatzen duen Idazkaritza Teknikoak, halaber, iaz egindako lanaren laburpena egin du, eta Udalsarea 2030eko kideentzat interesgarriak izango diren mugarri eta ekitaldiak partekatu ditu.

Tokiko ekintza

Udalerri Jasangarrien Euskal Sareak tokiko politikak gauzatu nahi ditu garapen jasangarriaren arloan, eta, horretarako, garrantzitsua da atxikitako udalerriek beren esperientziak ezagutzera ematea. Batzorde Teknikoa ez da norabide bakarrekoa: kideen parte-hartze aktiboa bilatzen du, eta 56. edizio honetan hainbat kasu aurkeztu dira.

Navaridasek eta Urduñak, adibidez, iraganeko laguntza-aginduetan sortutako proiektuak azaldu dituzte: alde batetik, Urduña, "Udal-sukaldea" programarekin (udal-jantokietan sortutako elikagai-hondakinak kontrolatzeko sistema); eta, bestetik, Navaridas, herriko urmaelean aplikatutako kontserbazio-neurriekin (proiektua nekazaritza-ingurunean garatzen da, eta mahastien ustiapena eta anfibio- eta narrasti-espezieentzako habitaten kontserbazioa bateragarri egiteko helburua du).

Nazio Batuen Batzar Nagusiak 2015ean onetsi zuen Agenda 2030, Garapen jasangarriaren 17 helbururekin (GJH) -Euskadik 18. helburua gehitu du: Hizkuntza- eta kultura-aniztasuna-. Bi urte geroago, Legazpiko Udalak LEGAZPI KLIMA 2030 Estrategia onetsi zuen.

Gaur egun, udalek bileran aurkeztutako jardunbide egokien artean, Legazpik txosten bat aurkeztu du Estrategiaren betetze-maila aztertzeko, indarrean sartu zenetik udalerriak GJHei egindako ekarpen-maila aztertuz. Horretarako, Udalsarea 2030ek eskura jartzen dituen baliabideak erabili ditu Udalak, eta horri esker Legazpiko jasangarritasunaren aurrerapenari buruzko ikuspegi globala lortu ahal izan da, eta emaitza horiek EAEko beste udalerri batzuetakoekin alderatu dira.