BIK 2050 proiektuaren hirugarren mahai politikoa gaur egin da Bilbon, eta 23 erakundek parte hartu dute, besteak beste, udalek, Eusko Jaurlaritzako sailek, agentzia publikoek eta Bizkaiko Aldundiko edo Ministerioko ordezkariek. Itsasadarraren inguruan klima-aldaketara egokitzeko proiektu erakusleen definizioan aurrera egitea izan du ardatz bilerak. 

Josu Bilbao Ingurumeneko sailburuordeak inauguratu du saioa, eta lankidetzaren balioan jarri du arreta, eguneroko bizitzari zuzenean eragiten dion erronka bati heltzeko: uholde-aldietatik hasi eta gero eta ohikoagoak diren bero-boladetaraino. 

Saioan, alde biko bileretan eta mahai teknikoan lortutako aurrerapenak aurkeztu dira, bai eta Europako LIFE SIP programarako BIK 2050en proposamena osatuko duten erakusleak aterako diren proiektu-sorta ere. Topaketaren helburu nagusien artean, erakunde bazkideen zeregina zehaztea eta klima-aldaketara egokitzen direla erakusten duten proiektuak bateratzea nabarmendu dira. 

 Itsasadarraren inguruan klima-aldaketara egokitzeko proiektu erakusleen definizioan aurrera egitea izan du ardatz bilerak

BIK 2050 proiektuak dagoeneko bistakoak diren inpaktuei aurre egiteko jarduerak aurreikusten ditu, besteak beste, bero-boladei edo ibai, euri eta kostaldeko uholde gertakariei aurre egiteko, azpiegitura berdeak, jarduketa hidraulikoak eta naturan oinarritutako soluzioak konbinatzen dituzten soluzioen bidez. Era berean, Bilboko itsasadarraren estuarioan zehar garatzea aurreikusten da, lurraldearen erresilientzia eta herritarren bizi-kalitatea hobetzeko. 

Eusko Jaurlaritzak bultzatutako eta Ihobek koordinatutako ekimen hau bat dator klima-aldaketara egokitzeko Europako eta erkidegoetako politikekin, eta erreferentziazko proiektu estrategiko gisa finkatu nahi da, bai ikuspegi integralagatik, bai hiriguneko eta hiri inguruko beste eremu batzuetan ezagutza eta irtenbide errepikagarriak sortzeko duen gaitasunagatik.